١٢ مشكلة مزعجة بتعاني منها الستات في الصيف

19/06/2019

كل سنة واحنا حرانين وملزقين عشان كمان يومين بالظبط 21 يونيو الصيف هيبدأ رسمياً وهيبقى لازم نواجه حاجات مابنحبهاش، خصوصا الستات بنعاني من بعض المشاكل الصيفية المتكررة اللي بنكرهها زي:

1- لما بتلبسي جيبة أو فستان في الصيف مشكلة فخادك اللي بتلزق في بعض، وفي أخر اليوم هتلاقي نفسك محتاجة "كيناكومب" عشان التسلخات.

2- وشك هيعرق والمكياج بيسيح خصوصا "الفاونديشن" هيسيح على وشك مع أول شوية عرق.

3- جسمك لون ودراعك لون لو مش محجبة، ولو محجبة كف ايدك ووشك بيبقوا لون تاني خالص ومكان الطرحة بيبقى متحدد.

4- عشان تلبسي براحتك في الصيف لازم أغلب الوقت تعملي "Shaving" مش زي الشتا.

5- لو عملتي شعرك في الصيف مش هتلحقي تتهني بيه لأخر الخروجة، هيقلب كيرلي من غير أي إرادة ليكي فيه.

6- ولو مش عاملة شعرك حتى لازم أغلب الوقت تبقي رافعة شعرك عن قفاكي وضهرك عشان بيلزق فيه مع العرق وبالذات لو شعرك طويل.

7- بتقومي من على الكرسي بتلاقي مكانك كله مياه واثبتي بقي للناس إن ده مجرد عرق، لو لابسه بنطلون قماش وقعدتي بيه فترة طويلة هتقومي تلاقيه مبلول برضه من العرق

8- الجزم والكوتشيهات و"السليبرز" وأي حاجة هتلبسيها هتعمل "كالو" في رجلك عشان رجلك بتورم في الصيف.

9- التكييف بيبقي ساقعة جدا عليكي في أي مكان بس خصوصا يعني في الشغل ولازم تلبسي حاجة تقيلة في حين إنك لما بتخرجي برا المكان بتتحري جدا.

10- إنك تلبسي "البرا" طول النهار دي مهمة صعبة عمر ما في راجل هيحس بيها مع الحر والعرق.

11- لو محجبة صعب تلاقي هدوم صيف بسهولة عشان أغلبها يا محتاجة حاجة تلبسيها تحتها يا مش لايق مع الحجاب، وهضطري تلبسي كارينا وده ممكن يسببلك شوية مشاكل.

12- مش محتاجين نوصف كتير بس "البيريود" في الصيف بتبقى معاناة.

Comments: