أمم أفريقيا.. زيمبابوي صاحبة أسوأ ذكرى في تاريخ منتخب مصر

21/06/2019

المصريين كلهم مترقبين انطلاق بطولة كأس الأمم الأفريقية 2019، واللي بتتلعب على أرضنا لأول مرة من 13 سنة، وهي البطولة اللي ليها طعم خاص عند المشجعين المصريين لأن منتخبنا هو الأكثر تتويجا بيها برصيد 7 بطولات.

ماتش الافتتاح قدام زيمبابوي بيعتبره أغلب الجمهور الماتش الأسهل لأن زيمبابوي تصنيف رابع في البطولة، ده غير إنها من أضعف الفرق المشاركة، المفاجأة بقى إن زيمبابوي هي صاحبة أسوأ ذكرى مع منتخب مصر، في تصفيات كاس العالم 1994، واللي اتلعبت في الولايات المتحدة.

في 1993، لعبت مصر زيمبابوي ماتش هيتأهل الفايز فيه للدور التاني من التصفيات، وبالفعل فازت مصر 2-1 لكن طوبة اترمت من مدرجات مصر على الجهاز الفني لزيمبابوي ادعى بسببها المدرب إنه اتصاب، قرر الاتحاد الدولي يعيد الماتش في أرض محايدة عقابا لمصر، اتعاد الماتش في مدينة "ليون"، الماتش انتهى بالعادل السلبي واتأهلت زيمبابوي للدور التاني لأنها كانت متصدرة المجموعة بـ 10 نقط، وكانت مصر في المركز التاني بـ 7 نقط.

وعموما مصر واجهت زيمبابوي 14 مرة فازت في 8 مرات واتعادلت 4 مرات، وخسرت مرتين بس، وسجلت مصر 24 هدف وتلقت 13 هدف، أما على مدار تاريخ البطولة، فمصر لعبت 96 ماتش فازت في 54 واتعادلت في 17 واتهزمت في 25، سجلت 159 هدف وتلقت 87 هدف، في حين زيمبابوي اللي اتأهلت للبطولة 3 مرات بس، لعبت 9 ماتشات، فازت في 2 واتعادلت في واحد واتهزمت في 6.

Comments: