اعرف الجوايز اللي هتاخدها منتخبات كاس الأمم: 4.5 مليون دولار للبطل

22/06/2019

كأس الأمم الأفريقية واحد من أهم الأحداث الرياضية على مستوى العالم، مش بس لأنها بطولة بتجمع نجوم كبار بيلعبوا في دوريات كتير في كل حتة في العالم، لكنها بطولة بيتابعها ملايين الناس في أفريقيا والشرق الأوسط تحديدا، وفي كل مكان في العالم، وبالتالي عوائد البث التلفزيوني والإعلانات اللي بتيجي من وراها بتبقى ضخمة جدا، وده اللي خلى شركة زي "توتال" تدفع مبالغ طائلة عشان تبقى راعي البطولة وتتسمى على اسمها "توتال مصر 2019".

"كاف" رفع الجوايز المالية اللي بيحصل عليها المنتخبات المشاركة في البطولة، عشان ياخد البطل 4.5 مليون دولار، مقابل 2.5 مليون دولار للوصيف، أما المنتخبات الأربعة اللي هتتأهل لقبل النهائي فهياخد كل منتخب 2 مليون دولار، وهتحصل المنتخبات اللي هتتأهل لربع النهائي على 800 ألف دولار لكل منتخب.

ورغم رفع الجوايز المالية في كاس الأمم الأفريقية، لكنه لسه أقل بكتير من جوايز كاس الأمم الأوروبية، وده يمكن راجع لإن البطولة الأوروبية بتجذب عدد مشاهدين أكبر وفيه اهتمام إعلامي أضخم بيها، وعلى سبيل المثالي، بطولة "يورو 2016" كان بيحصل فيها كل منتخب بمجرد مشاركته على 8 مليون يورو، وبعدين في مرحلة المجموعات الفوز بياخد كل منتخب مليون يورو مقابل الفوز، ونص مليون يورو مقابل التعادل.

الفائز ببطولة "يورو 2016" وهو منتخب البرتغال، حصل على 8 مليون يورو جايزة مالية عن النهائي فقط (غير اللي حصل عليه على مدار البطولة)، في حين الوصيف، منتخب فرنسا، حصل على 5 مليون يورو.

Comments: