تفاصيل تطبيق "الفار" في كاس الأمم: كاميرات جوه عربيات متنقلة

25/06/2019

الاتحاد الأفريقي لكرة القدم "كاف" قرر تطبيق تقنية "الفار" بداية من دور التمانية في بطولة كاس الأمم الأفريقية 2019، والحقيقة إن تأخير تطبيق "الفار" لحد ربع النهائي سببه التكلفة العالية جدا للتطبيق في مصر، في ظل عدم وجود الأجهزة والمتخصصين، وبالتالي قرر الاتحاد بالاتفاق مع اللجنة المنظمة في مصر، على التطبيق في المرحلة المصيرية بس.

عصام عبدالفتاح، رئيس لجنة الحكام في الاتحاد المصري لكرة القدم، قال في تصريحات لإذاعة "إينرجي"، إنه مش هيتم تطبيق التقنية من خلال بناء غرف خاصة يقعد فيها الحكام قدام الأجهزة، لكن هتتطبق بعربيات "فان" متنقلة، هتكون أقلق في التكلفة، وفعالة في التنقل بين أكتر من ستاد.

عبدالفتاح قال إنه تم التعاقد مع شركة متخصصة، هتوفر الأجهزة والشخص المسؤول عن تشغيلها، وإعادة اللقطات للحكام (Operator)، وإن الموضوع هيتطبق كمان في المباريات المتبقية في الدوري المصري، وهيتكلف من 16 لـ 17 مليون جنيه، كمان إن الـ Operator الأجنبي اللي هيشغل التقنية في مصر، هيعلم كوادر مصرية تقدر تطبق التقنية فيما بعد.

وكشف عصام عبدالفتاح، عن إن الاتحاد الأفريقي بيفكر بشكل جدي، في إنشاء مركز للـ"فار" في القاهرة، تمهيدا لتطبيق التقنية في بطولات الاتحاد الأفريقي المختلفة.

Comments: