٨ أرقام ترجح كفة منتخب مصر في ماتش الكونغو: اكتساح فرعوني

25/06/2019

بعد الافتتاح المبهج والفوز غير المرضي لمنتخب مصر ضد زيمبابوي في أولى ماتشاته في كاس الأمم الأفريقية 2019، أمل كبير عند المصريين في ماتش الكونغو اللي هيتلعب الساعة 10 مساء يوم الأربع، أمل في تقديم أداء ممتع وفوز يؤمن لمصر التأهل لدور الـ 16 من البطولة.

ورغم إن الأرقام مش دليل مطلق أو ضمان على فوز مصر على الكونغو، إلا إن لغة الأرقام مؤشر مهم لتوقع الفايز في أي ماتش، ودي أرقام بترجح كفة مصر للفوز على منتخب الكونغو الديمقراطية:

1- مصر قابلت الكونغو تاريخيا 11 مرة (شامل الرسمي والودي)، فازت مصر في 7 واتعادلت في 3 واتهزمت في ماتش واحد بس

2- في كاس الأمم، مصر لاعبت الكونغو 3 مرات، فازت في مرتين وخسرت في مرة

3- آخر نتيجة جيدة للكونغو ضد مصر، كانت سنة 2012، لما اتعادلوا معانا 0-0 في ماتش ودي

4- مصر كسبت 7 من آخر 9 ماتشات ليها في كل المسابقات، وكسبت 20 من آخر 23 ماتش لعبتهم في كاس الأمم الأفريقية

5- نجم مصر محمد صلاح، سجل 6 أهداف في آخر 7 ماتشات دولية ليه في كل المسابقات

6- الكونغو خسرت 4 من آخر 5 مواجهات مع مصر في كل المسابقات

7- الكونغو خسرت 4-1 في آخر ماتش ليها ضد مصر في كاس الأمم الأفريقية، واللي كان في ربع نهائي نسخة 2006، وسجل الأهداف، أحمد حسن هدفين، وعماد متعب هدف وحسام حسن هدف، وسجل هدف الكونغو عبدالظاهر السقا في مرماه

8- مصر فازت في ماتشها الأول في البطولة الحالية ضد زيمبابوي، لكن الكونغو خسرت ماتشها الأول ضد أوغندا 2-0

Comments: