٥ أسباب لاستمتاع "الكبار" بالكارتون مهما كبروا

25/06/2019


الموضوع ده عشان تعرف تبرر براحتك لو إنت من محبي ومتابعين "سبيس تون" و"نيكلودين" و "إم بي سي 3"، عشان فيه ناس مهما كبرت صغيرة زي ما قال الفنان عمرو دياب وهيفضلوا يحبوا الكارتون وأفلام الأنيميشن.

ممكن العالم قدر يحتوي الأشخاص دي شوية، خصوصا لما بقى فيه كارتون للكبار بس، ولكن فيه أشخاص فعلا الكارتون والأنيميشن والأنمي هما أفلامهم ومسلسلاتهم المفضلة بالرغم من إنهم بيكبروا والحالة دي أطلقوا عليها اسم "Kidult" وهي مزيج بين "Kid + adult" ومعناه الأشخاص الكبار اللي عندهم عادات الأطفال أو المراهقين يعني.

فيه أسباب منطقية جدا لحبك للكارتون رغم إنك كبير وهي:

1- عشان تفصل من الواقع:

كونك شخص كبير وبالغ فده بيخلي عندك مسؤوليات والتزامات وعشان كده من الأفضل إنك تفصل فعلا عن طريق إنك تتفرج على كارتون وتضحك شوية، في الكارتون كل حاجة متاحة عشان كده الموضوع بيبقى مسلي أكتر، ده غير إن فيه كارتونات بيبقى فيه فكرة وبتلهم الواحد ممكن يحل مشاكله إزاي، وبالذات في مسلسلات الأنمي.

2- الصراحة:

الكارتون اللي بيقى مخصص للكبار بيبقى فيه مجموعة من الرسايل المباشرة اللي بتتقدم للمشاهدين، ده غير إنه مابيكونش لازم يكون فيه تكلفة كبيرة ولا بيشترط ممثلين مشهورين، أهم حاجة بيركزوا عليها القصة، زي مثلا "The Simpsons"  بيمثلوا العيلة والغلطات اللي بتحصل فيها والمشاكل اللي بتحصل بسبب الأب المستهتر.

3- الذكريات السعيدة:

لما شخص كبير بيتفرج على الكارتون بيستعيد ذكريات طفولته، وبيرجع لأفضل ذكرياته سواء كانت طفولته صعبة أو مسلية، وفي الحالتين الطفل هيبقى عايز يرجع لطفولته تاني، زي مثلا كارتون الجاسوسات أو فتيات القوة لو كنتي بتتفرجي عليهم وإنتي صغيرة، أكيد اختارتي شخصية فيهم وقولتي إنك شبهها.

4- سهل تستمتع به:

لما بتتفرج على فيلم بتستني تشوف إخراج وأداء وسيناريو وكل حاجة حلوة، لكن لما بتتفرج على كارتون فكل اللي إنت عايزه إنك تستمتع وتسترخى عشان فيه كوميديا.

5- وقت الكارتون بيكون قليل ومحدد:

ساعات بتبقى عايز تتفرج على حاجة سريعة قبل ما تنام مثلا أو بعد يوم طويل، بتبقى عايز تفصل وحلقة المسلسل ساعات بتوصل لساعة، والفيلم بيبقى ساعتين تقريبا، لكن حلقة الكارتون بتكون بسيطة وتنفع لأي وقت، ده غير إنك ممكن تقفلها أي وقت وترجعلها تاني ومابتحسسكش بالذنب عشان بتقضي قدامها وقت طويل.

Comments: