٥ لاعيبة كرة لهم فضايح جنسية غير عمرو وردة

26/06/2019

ظهر من كذا يوم "سكرين شوت" للاعب الكرة عمرو وردة إنه كان باعت لبنت على الأكونت بتاعها على إنستجرام جملة "Boxing? Haha"  وبعد كده البنت طلعت "سكرين شوتس" كتير عن لاعيبة المنتخب وهما باعتين لها "دي إم" على إنستجرام، وده غالبا كان السبب إن بنت كمان مكسيكية تطلع سكرين شوتس على تويتر لمحادثات بينها وبين عمرو وردة النهاردة الصبح، وهو كان بيحاول يقنعها يتكلموا فيديو كول، وبعدها انتشر فيديو لعمرو وردة وأخيرا ظهر خبر استبعاده من المنتخب الوطني.

عمرو وردة مش أول لاعب كرة يتم اتهامه في قضايا جنسية، فيه لعيبة كرة كتير ليهم فضايح جنسية سواء كانت تحرش أو اغتصاب أو غيره، خلينا نقول لكوا ا ونفتكر زي مين تاني قبل كده:

1- كريم بنزيما وفرانك ريبيري:

انتشرت القضية في سنة 2014 ولكن الحادثة كانت حصلت في 2008 تقريبا، والبنت وقتها كانت قاصر في سن 16 أو 17 سنة، وقالت إنهم اقاموا علاقة جنسية معاها كل واحد منهم لوحده، لكنهم برروا وقالوا إنها كدبت عليهم في سنها.

2- ديفيد دي خيا:

الإسباني ديفيد دي خيا، حارس مرمى نادي مانشستر يونايتد ولاعب نادي أتليتك بلباو إيكر مونياين، اعتدوا جنسيا على بنت قاصر في 2012 في معسكر خاص بالمنتخب الإسباني، والواقعة حصلت في فندق 5 نجوم في العاصمة الإسبانية مدريد وكان فيه شهود عليها.

3- مارادونا:

مارادونا واحد من أساطير الكرة لكن عموما كان له كذا فضيحة جنسية وكذا اتهام بالاغتصاب، لكن آخرها قضية الصحفية الروسية اللي اتهمتهإنه اتحرش بيها جنسيا أثناء ما كانت بتعمل معاه حوار صحفي، لكن هو قال إنها هي اللي أغوته وإنه نادلها أمن الفندق، ونشرت جريدة "صن" إن الحادثة كانت عبارة عن إنها طلبت منه تعمل معاه حوار صحفي بس هو اشترط إنه يكون في أوضته ولما دخلت معاه بدأ يخلع هدومه واتحرش بيها.

4- كريستيانو رونالدو:

اتهمت بنت كريستيانو رونالدو إنه اغتصبها في 2010 بعد ما عرض عليها إنها تيجي معاه الفندق لكن بعد ما رفضت اغتصبها ونشرت الحكاية في مجلة Der Spiegel الألمانية.

5- نيمار:

من شهر وشوية برضه فيه بنت اتهمت نيمار باغتصابها في فندق في باريس في 2019 ورفعت عليه قضية ونفى نيمار طبعا الواقعة دي في بوست على إنستجرام.

Comments: