٥ احتمالات كارثية للـ sexting: من الإحراج للشعور بالعار

26/06/2019

مسموح أو مقبول في بعض الحالات لما بيكون فيه اتنين مشدودين لبعض أو فيه بينهم علاقة يكون بينهم "سكستينج" والـ "سكستينج" هو إرسال المحتوى الجنسي، وعلى قد ما هو مقبول أحياناً بين الشخصين (وغالبا بين الشخصين بس لإن المجتمع مش قابل حاجة زي كده) أو مسموع عنه وتحطله تعريف ومسمى عشان بيتم أصلا، على قد ما هو خطر وبيسبب مشاكل كتير الشخص في غنى عنها.

مهم جدا تعرف العواقب اللي ممكن تحصلك من "السكستينج" وتوعي بيها أطفالك أو المراهقين اللي تعرفهم قبل ما يقعوا في أي مشكلة من عواقب الموضوع، عواقب "السكستينج" متقسمة لكذا حاجة:

عواقب عاطفية زي:

1- الإحراج والذل: 

الشخص اللي بيبعت نودز أو بيعمل "سكستينج" ماعندوش ضمانات إن الصور أو الكلام يفضلوا سر بينه وبين الشخص التاني، اه فيه حالات فردية بتفضل فيها الصور والكلام خاصة بين الشخصين بس مش دايما، وبمجرد ما تحصل مشكلة أو شخص يقلب على التاني الصور بتنتشر.

2- التنمر:

كتير من الأشخاص سواء كانوا بنات أو ولاد اتعرضوا للتنمر بسبب إنهم بعتوا صور أو حد شاف سكرين شوتس لمحاداثات ليهم، ده غير إن حياتهم الخاصة بتبوظ لفترة من الوقت.

3- نهاية علاقاتك:

فيه ناس كتير ممكن ماتقبلش وجودك في حياتها زي صحابك مثلا ممكن يقطعوا علاقيتهم بيك، لإن فيه ناس هتعتقد إن حياتهم هتكون في خطر لمجرد إنهم يعرفوك أو هيحسوا بالعار.

4- الشعور بالذنب والعار:

فيه بعض الناس ممكن يحسوا بالذنب أو العار لمجرد إنهم بعتوا حاجة بتتنافى مع مبادئهم وده بيأثر على احترامهم لنفسهم وتقديرهم لذاتهم.

5- الإحساس باليأس: 

مع مشكلة التنمر والسخرية والإحساس بالذنب، كل ده بيخلي الشخص يحس باليأس وممكن يبقى سبب في إنه ينتحر، ولو تعرف حد ووصل للحالة دي لازم تقنعه يروح لحد متخصص عشان يساعده.


 

Comments: