١٠ غلطات بنعملهم في تربية الحيوانات الأليفة بيقصروا عمرهم

01/07/2019

كتير مننا عنده حيوانات أليفة في البيت سواء كانت قطط أو كلاب أو غيرهم، وكلنا نفسنا نعتني بيهم، لكن للأسف مش كلنا بنقدم لهم الرعاية الصح وممكن الرعاية غير المناسبة دي تؤدي لأمراض وأذى مباشر للحيوان.

جمعنا شوية مشاكل بنعملهم في العناية بالحيوانات وهما زي:

1- إنك تأكلهم لحوم و"دراي فوود" في نفس الوقت:

في البداية بس لازم تقرر إنت هتأكلهم إيه، لحوم ولا "دراي فوود"، لو هتأكلهم أكل عادي و"دراي فوود" في نفس الوقت خليك عارف إن ده مضر للجهاز الهضمي بتاعهم، ولو اخترت إنك تأكلهم أكل طبيعي فلازم تاخد رأي دكتور بيطري عشان يقولك قايمة الأكل المخصصة ليهم، وماتنساش تغيرلهم المياة مرة على الأقل في اليوم.

لكن لو بتفضل "الدراي فوود" فلازم تقرأ المكونات قبل ما تشتري الأكل، والأحسن إنك تختار أكل مافيهوش أي توابل أو درة، وخلى بالك من نسبة اللحوم والمكونات التانية في أكل القطط.

ولو بتفضل الأكل العادي للقطط ممكن تأكلهم أكل زي ده مثلا:

- منتجات الألبان اللي نسبة الدسم فيها قليلة أو الخالية من الدهون زي الجبنة واللبن والقشطة

- لحوم نية أو مسلوقة بس تكون (لحم بقري أو فراخ أو ديك رومي أو أرنب)

- الكبد والقلب والمعدة 

- السمك مرة أو مرتين بالكتير في الأسبوع وتكون مسلوقة أو من غير عضم 

- صفار البيض المسلوق مرة أو مرتين في الأسبوع بالكتير

لكن فيه أكلات ممنوعة أو غير مسموح بيها:

- اللحوم الدهنية زي لحم الخنزير واللحم الضاني لإنهم ممكن يدمروا كبد القطط

- الحلويات 

- الملح

- البصل 

- الكحوليات

- الأكل العادي اللي بيكون مسبك أو مقلي أو حراق

2- إنك تودي حيوانك الأليف للدكتور أقل من مرة في السنة

خلي بالك من زيارات الدكتور المنتظمة لإن هي دي الطريقة الوحيدة اللي ممكن تتجنب بيها الأمراض أو تلاقيلها العلاج في الوقت المناسب، ولازم كمان تطعم القطط من الأمراض المنتشرة عشان تحافظ على سلامة القطط أو الكلاب اللي عندك

3- الغلطة التالتة: تسيب القطط جنب شباك مفتوح:

فيه قطط كتير بتتبع غريزتها وبتنط عشان تمسك العصافير أو الطيور اللي بره الشباك، لكن كتير منهم بينطوا وبيكسروا رجليهم أو ضهرهم وده اللي بيسبب لهم أذى، عشان تتجنب المشكلة دي ياريت تقفل أي شبابيك مفتوحة.

4- عدم تعقيم القطط بدافع الشفقة:

فيه ناس كتير بيصعب عليها الحيوانات بتاعتها وبتتجنب عمليات التعقيم ليهم، لكن الحقيقي إن العملية غير مضرة خالص وبيتم تخدير الحيوانات قبلها ومالهاش تأثير سلبي عليهم، الحاجة الوحيدة اللي المفروض تخلي بالك منها هي إن القطط تتخن مثلا لإنهم بيبقوا كسالى جدا بعد العملية دي عشان كده لازم تأخد بالك من اللي القطط بتاكله، ولما بتعمل عمليات التعقيم دي بتتجنب مشاكل كتير ممكن يعملها زي الصريخ مثلا أو الحمل الغير متوقع.

5-عدم تسريح شعرهم وغسل أسنانهم:

من الناحية المثالية بقى المفروض يتم فحص بوق القطط مرة على الأقل كل سنة خصوصا لو ريحته وحشة، وفيه فرش سنان مخصوصه ليهم ممكن تجيبها من محلات الحيوانات الأليفة، وبالنسبة لشعر القطط فلازم تغسل شعرهم كل فترة وتسرحة خصوصا لو كان نوع القطة إن شعرها طويل، وفيه شامبو مخصوص مضاد للفطريات ممكن تستخدمه كل 6 شهور مرة.

6- تأكل كلبك أكل من بتاعك:

كل الدكاترة البيطريين متفقين إن ماينفعش تأكل الكلب من نفس أكلك وده لإن جهازك الهضمي بيختلف عن جهازهم الهضمي وعصارة المعدة كمان مختلفة، ومش من الصح إنك تعبر لكلبك عن حبك له عن طريق إنك تأكله من أكلك، ولازم نظام غذائي مخصوص للكلاب بيتكون من منتجات ألبان ولحوم زي القلب والكلى مثلا، وممكن بعض الخضروات والفاكهة اللي مش مسكرة.

7- غسل رأسهم في الأول وتخطي العناية بسنانهم:

حمى الكلاب من الأفضل مايكونش تبع جدول زمنيويكون بمجرد ما كلبك يتوسخ أو يترب تحميه، ولازم كمان وإنت بتحمي الكلب تغسل رأسه في الأخر عشان بيبدأ يترعش من كتر البرد لو غسلت رأسه في الأول، وماتنساش طبعا العناية بسنان الكلب، عشان كده لما تودي كلبك لدكتور بيطري المرة الجاية اطلب منه يتأكد من صحة سنانة، وممكن كمان تجيبله فرشة ومعجون سنان من محل الحيوانات الأليفة.

8- ماتديش الكلب حب وحنان كفاية:

الكلاب غير القطط، القطط كائنات مستقلة شوية لكن الكلاب كائنات إجتماعية هيحبوا يتواصلوا معاك أو مع كلاب تانية، الكلاب شبهننا شوية في الحته دي بيبقوا محتاجين حياة إجتماعية عشان يطوروا شخصيتهم وعشان مايبقوش عدوانيين أو بيخافوا بسهولة، التواصل معاهم هيساعدهم يتطوروا عاطفياً وجسديا وإجتماعياً.

9- ماتاخدش بالك من الطوق بتاعهم قبل ما تمشيهم:

لازم كلبك يكون مرتاح وعشان كده خد بالك من التعليمات دي: بالنسبة للكلاب الكبيرة خلي فيه مسافة صوباعين بين رقبته وبين الطوق والكلاب الصغيرة صوباع واحد، لإن الطوق لو كان ضيق ممكن يأذي الكلب ولو كان واسع جدا احتمال الكلب يهرب منك أصلا، وماتنساش تغير الطوق حسب وزن وسن الكلب أكيد.

10- تسيب الكلب محبوس في شقة لوحدة كتير:

بالنسبة لكل الكلاب مع اختلاف أعمارهم لازم يقدروا يبقوا أحرار وقت كفاية عشان ينطلقوا ويتعرفوا على العالم ويتواصلوا مع كلاب تانية، لو ماخدوش الوقت الكافية من ده هيحتجوا بأسلوبهم المناسب عن طريق إنهم يكسروا حاجات في البيت مثلا أو حاجاتك الشخصية، كمان لازم الكلب يتحرك عشان صحته، وخد بالك كده إن بعد ما تمشي الكلب فترة طويلة هتلاقيه بيروح ينام. 

Comments: