موقع بيخليك تدوس على خريطة بلدك وتشوف الدول اللي ممكن تسافرها من غير فيزا

01/07/2019

السفر متعة أي حد بيتمناها، لكن كعادة أي حاجة حلوة دايما في حواليها محاذير وتفاصيل كتيرة، زي إنك لازم تكون مخلص الخدمة العسكرية أو واخد إعفاء، وإن البلد اللي إنت مسافرها توافق على "الفيزا" بتاعتك، وإنك يكون معاك فلوس أصلا، عشان كده ماركوس ليرنر عمل موقع اسمه Travelscope، سنة 2015.

الموقع ده بيتيح للمستخدم إنه يدوس على خريطة بلده عشان تطلعه الدول اللي يقدر يسافرها من غير "فيزا"، وعلى جنب، عامل ليستة بالدول وقدامها رقم البلاد اللي ممكن يسافرها مواطن الدولة دي من غير فيزا.

الموقع كمان بيوضح متطلبات الدخول من غير فيزا، لأن بعض الدول بتدي الفيزا بمجرد الوصول للمطار، ودول تانية بتدي الفيزا أونلاين قبل السفر، ونوع تالت مش بيتطلب فيزا من الأساس، وبيدي إقامة لمدة معينة (غالبا 90 يوم) من غير فيزا.

ومن أهم الدول اللي ممكن يسافرها المواطن المصري من غير فيزا، جورجيا وإيران والأردن وأندونيسيا وماليزيا.

Comments: