اعرف 9 خطوات هتنسيك الذكريات المؤلمة

03/07/2019

فيه ذكريات ومواقف الواحد عدى بيها بيبقى نفسه فعلا ينساها لإنه لو نسيها هيعرف يتعامل مع مشاكل كتير حصلتله بسببها، وبالرغم إن موضوع النسيان صعب إلا إنه مش مستحيل عشان كده فيه شوية طرق عشان تنسى بيها، زي مثلا إنك تعمل ذكريات جديدة حلو، وخليك دايما فاكر إن ممكن تنسى الذكريات السيئة أو تنسى اللي عايزه..  فخلينا نقولك ممكن تنسى إزاي:

1- إعرف إنت عايز تنسى إيه:

قبل ما تنسي الذكرى افتكر التفاصيل اللي خلت الذكرى دي تبقى سيئة، أه ده ممكن يبقى حاجة صعبة بس ده ضروري، اكتب إجابات على الأسئلة دي:

1- إيه اللي حصل؟

2- مين اللي شارك في اللي حصل؟

3- امتى وفين حصل الموقف ده؟

4- إيه اللي كان ممكن يحصل بعد كده؟

5- كنت حاسس إزاي؟

2- فكر في أكتر حاجة أذتك في الذكرى دي، الخطوة دي هتساعدك عشان تعرف إيه الحاجة اللي أزعجتك أكتر في الذكرى دي، أكتب الحاجات اللي فوق دي لإن ده هيساعدك على النسيان، وخلى في دماغك إنك أه صعب إنك تنسى الإكس مثلا بس ممكن تنسى ذكرى حصلت معاه أومكان روحته أو أحداث حصلت أو "دايت" نزلته معاه، يعني على سبيل المثال ممكن تنسى ريحته مثلا.

ولو حصلت معاك مواقف صادمة حاول تكتب اسماء الناس اللي اتحرشوا بيك مثلا، والمواقف المعينة الصغيرة اللي خليتك تتضايق وانسى التفاصيل الصغيرة زي ريحة المكان وريحة الأشخاص.

3- ممكن تستخدم ال" ritual release" عشان تنى وهي عبارة عن تمارين عقلية بتعملها عشان تساعدك على النسيان، كل اللي عليك إنك تتخيل اللقطة اللي حصلت وتتخيل إنك بتولع فيها، خصوصا إن ذاكرتك بتحتفظ بالصور دايما، فتخيل الصورة كده وتخيل إنك بتولع فيها اللي هو طرف الصورة هيبقى بني وبعدين يتحول لإسود بعدين الصورة بتتلاشى خالص.

4- امسح الصور أو الفيديوهات اللي بتتعلق بالذكريات المؤلمة واتخلص من هدايا الشخص ده مثلا لإنها طول ما هي قدامك هتفتكر غصب عنك.

5- فكر في التنويم المغناطيسي لإنه أوقات بيكون مفيد لنسيان الذكريات، بس دور على حد "بروفيشنال" لو هتجرب التنويم المغناطيسي، لكن خلي بالك ممكن التنويم المغناطيسي مايكونش هو أحسن حل ليك.

6- افتكر العيوب اللي كانت بتبقى في الأوقات الحلوة اللي بقيت ذكريات مؤلمة، افتكر مثلا إنك كنت بتبقى مش مبسوط من حاجة أو كنت بتبقى مجبر على حاجة، والعكس كمان لما تفتكر ذكرى مؤلمة اعمل حاجة تبسطك في الوقت اللي بتفكر فيها، ممكن مثلا تفتكر الإحراج اللي حسيت بيه أو الحزن لما سبت الاكس وانت بتتفرج على فيلم بتحبه أو تسمع مزيكا حلوة، أو تولع شمع ريحه حلوة وإنت بتاخد دش، ولو ده مانفعش معاك حاول تشتت إنتباهك عن طريق إنك تسمع دوشة لما تفتكر الذكرى دي.

7- اعمل ذكريات جديدة، حتى لو مش هتساعدك تنسى على طول بس هتساعد الذكريات المؤلمة القديمة تبقى أبعد شوية، زي إنك تلاقي شغل جديد، تقرأ كتاب، تتفرج على فيلم، تعمل صحاب جداد.

8- حاول إنك تجرب حاجات شبه الذكريات القديمة المؤلمة اللي عايز تنساها، زي مثلا لو الذكريات المؤلمة دي في اسكندرية حاول تسافر اسكندرية تاني وتجيب حاجات من هناك وتتصور على البحر صور جديدة تاني، لو فيه ريحة معينة بتاعت حد معلقة في ذاكرتك شم روايح تانية تحاول تنسيك الريحة دي أصلا، أو لو الذكريات دي متعلقة بالاكس وعلاقة فشلت انزل "دايت" جديد غالبا ده بيساعد الشخص على تخطي العلاقات القديمة.

9- لو ماكنتش قادر فعلا تتخطى الذكريات دي وتنساها أو هي مؤلمة بالنسبة لك بدرجة أكبر من كل الطرق والمحاولات دي حاول تطلب مساعدة من حد متخصص وروح لدكتور نفسي هو هيساعدك إنك تتعامل مع مشاعرك في الذكريات المؤلمة  

Comments: