ليه لجنة الامتحان هتفضل تطاردك في أحلامك طول العمر؟

03/07/2019

كتب: نوران عاطف

على الرغم من انتهاء موسم الامتحانات، خصوصًا الثانوية العامة، إلا إن لحظة مواجهة الامتحان، شكل اللجنة، أو ورقة امتحان معينة، ممكن تفضل معاك طول الحياة!

كلنا مهما كبرنا وعجزنا وخلصنا امتحانات بتفضل ورقة الامتحان واللجنة تطاردنا في أحلامنا، ممكن في يوم تصحى على كابوس إن عندك امتحان ومش جاهز، أو مش عارف تحل، أو عايز تغش، أو نزلت بالبيجامة!

كل تفصيلة منهم لها معنى ودلالة من حياتك، عشان كدة جمعنالك كل النظريات اللي اتقالت في مواقع dreammoods،  dream-meaning، و encyclopedia اللي بتحلل تفاصيل حلم اللجنة والامتحان.

1- نوع المادة

اختلفت التفسيرات ووجهات النظر، لكن منها اللي بيقول إن المادة اللي بتمتحنها بتفرق في دلالتها، يعني لو حلمت بامتحان رياضيات فدة معناه مشكلة في حياتك العملية مش عارف تتعامل معاها، أما لو كان مادة نظرية أو أسئلة مفتوحة فدة معناه عوائق مش عارف تتعامل معاها في حياتك الاجتماعية.

2- مشاعرك وإنت بتمتحن

الامتحان بشكل عام معناه اختبار حياتي أو إنساني بتمر بيه، وممكن يكون مرحلة لها أهداف معينة وبتحكم فيها على نفسك أو حد بيحكم عليك، ومشاعرك السلبية أو الإيجابية علامة على إنك بتتعامل مع حياتك إزاي الفترة دي؟

3- عديت بسلام

لو حلمت إنك نجحت وعديت تمام من الامتحان دة ممكن يبقى رمز لمرحلة جديدة في حياتك، زي تخرج، مشروع أو شغل الجديد، جواز أو حمل، ولو كنت مش راضي أوي عن النتيجة أو المجموع فدة معناه إنك ممكن تبقى حاطط لنفسك هدف كبير شوية على المرحلة دي.

4- متأخر على الامتحان

التأخير معناه مشكلة في تنظيمك للوقت ولو متأخر بسبب إنك تايه فدة معناه إنك مش واثق من أهدافك المستقبلية.

5- الامتحان صعب جدًا

 دة معناه إنك مشكك في قدراتك على التعامل مع الأمور، أو بتمر بموقف صعب.

6- الامتحان جه وإنت مش جاهز

دة ممكن يبقى انعكاس لشعورك ناحية أهدافك الشخصية في حياتك وإنك لسة مش جاهز كفاية لها، أول بتماطل في وقت فاضلك على تسليم مشروع أو حدث مهم لازم تبقى مستعد له.

7-مش فاهم الأسئلة

لو حلمت إنك سقطت بسبب إنك مش فاهم الأسئلة دة بيعكس مشكلة تواصل في حياتك سواء الشخصية أو العملية، وممكن تكون في الوقت دة بالفعل فقدت عميل أو صديق بسبب سوء التواصل.

8- وجهة نظر أخرى

القاعدة الأساسية لتفسير فرويد للأحلام هي إنها طريق ما عشان تحقق فيه رغباتك أو الحاجات اللي بتتمناها، وأكيد مفيش حد بيتمنى إنه يسقط أو يتوتر في امتحان، لكن الفكرة هنا ممكن تكون رجوع للحظة المحورية في حياتك، واللي ممكن تبقى امتحان الثانوية العامة أو التخرج من الكلية، واللي لو ما كنتش عديت منه ماكنتش هتوصل لأي حاجة من اللي إنت فيها دلوقتي.

في النهاية عقلك الباطن بيرجع ليوم الامتحان لأنك طول حياتك ونشأتك مجهز إن دي لحظة محورية متوقف عليها مستقبلك وكل ما بتحس بضغط في حياتك أو إنك في لحظة حاسمة بيبقى أنسب تشبيه لها هو الامتحان ومشاعرك ناحيته.

Comments: