العين تفهم قبل العقل أحيانًا.. اتفرج على أشهر حملات التوعية بأضرار البلاستيك

03/07/2019

مؤخرًا زاد الاهتمام العالمي والمحلي ناحية توعية الناس بأضرار البلاستيك وآثاره على المدى الطويل والقصير على البيئة وبالأخص البيئة البحرية، لأن ببساطة البلاستيك مادة صعبة التحلل ولما بتاكلها الكائنات البحرية بتتسبب في أذى مباشر ليهم وغير مباشر للإنسان بأكله لها ودخول المواد السامة للسلسة الغذائية.

على جانب تاني الغازات السامة الناتجة عن وجود البلاستيك في البيئة وتعرضه لعوامل الجو بتساهم في تفاقم ظاهرة الاحتباس الحراري وازديادها، وبمناسبة اليوم العالمي للاستغناء عن الأكياس البلاستيك، جمعنالكوا أهم الحملات العالمية اللي ناقشت الفكرة وقدرت توصلها بوضوح.

1- كوكبك ولا البلاستيك؟!

في 2018 أطلقت ناشونال جيوجرافيك حملة بعنوان "planet or plastic" أو "البلاستيك الخطر القادم من البحر" في نسختها العربية، للتوعية بأخطار استخدام البلاستيك، والغلاف كان عبارة عن تصميم يبان للوهلة الأولى جبل تلجي لكن هو كيس بلاستيك ضخم.

2- 100 ألف ضحية سنويًا

تصميم من حملة مؤسسة World Wide Fund for Nature حاطت أزازة بلاستيك بدل الشكل اللي بيطلع فيه أي كائن بحري على الشط أما بيموت، لتقديم معلومة إن كل سنة التلوث اللي بيسببه البلاستيك بيأدي لموت أكتر من 100 ألف كائن حيوان في المسطحات المائية المختلفة.

تصميم تاني من نفس الحملة بيقدم نفس الفكرة لكن باستبدال الحيوان البحري جوة المحيط أو البحر بكيس بلاستيك.

اتجاه مختلف من نفس المؤسسة ولنفس القضية، لكن بيقدم مجموعة تصميمات عشان يوضح مخلفاتك البلاستيكية بتبقى إيه بالنسبة للبحر وحيواناته.

3- مكانهم مش بس مكانك

حملة مشابهة من Save Earth للتأكيد على إن آلاف الحيوانات البحرية بتموت سنويًا من البلاستيك، تحت عنوان "This home is not just ours, their too" لتوعية الناس إن الأرض مش مكان للإنسان بس لكن هو مكان الحيوانات كمان ولازم نحترم حقهم في الحياة.

4- البلاستيك دة بيروح فين؟

        

"البلاستيك بتاعك بيروح فين؟" حملة بتقدم رسوم بسيطة للكائنات البحرية وجسمها متكون من نفايات البلاستيك اللي بنرميها في البحر، ومع كل حيوان فيهم معلومة عن الضرر اللي بيحصل للفصيل دة سنويًا.

5- الإزازة مش حاجة بسيطة!

حملة من موقع REFILL بتتكلم بشكل خاص عن الأزايز البلاسيك وبتوضح إن فيه أكتر من 12 مليون قطعة بلاستيك بتوصل للمحيطات سنويًا وبتعتبر الأزازير تالت أكبر مصدر للتلوث من من مصادر البلاستيك بشكل عام بالإضافة لأنها بتسبب اختناق الحيوانات.

6- يعني اعمل إيه؟

هنا الحملة بتقدم خطوة متقدمة أكتر وهي 10 نصايح إزاي تتخلص من نفايات البلاستيك أو البدايل اللي ممكن تستخدمها.

Comments: