حوار مع عمرو وهبة: مش هستغنى عن السوشيال ميديا.. وهي دي حكاية إيفيه "علميًا وعمليًا"

04/07/2019

كتبت: نوران عاطف

من فترة مش بعيدة لكن سابقة لظهوره التلفزيوني والسينمائي الكبير، كان عمرو وهبة بيحكي عن مشواره لحد ما وصل لإنه بقى مشهور على السوشيال ميديا وموجود في برامج مهمة زي SNL بالعربي، وكان من أهم كلامه إن "كل الظروف كانت ضد إني أبقى كوميديان".. "أول برنامج إذاعي ليا كان كل ما فيه يؤدي للفشل.. ماكانش حد بيسمعه غير أنا ومراتي والكلب!".. واتكلم كمان سبب تراجعه عن فكرة الهجرة بعد 20 يوم بس في أمريكا كان "يعني إيه أقول إيفيه وماحدش يفهمه!".

وبيكمل إن حلمه في الوقت دة كان التمثيل، وبداية تواصله مع الناس بشكل مباشر في برنامج زي "نجوم بتحب مصر" كان لأنه حس إنه "يقدر يضّحك" وبدأ ظهوره وشهرته بشكله وأداءه بعد مشوار في الكتابة والإعداد لبرامج زي "أسعد الله مساءكم"، "البلاتوه"، و"SNL بالعربي" اللي اشترك فيه بالتمثيل كمان مش الكتابة بس.

قابلنا عمرو وهبة بعد بدأ خطوات مهمة وملموسة في طريق حلمه، وسألناه عن شعوره دلوقتي ووجهات نظره وأمنياته.

- نبدأ من الآخر.. إزاي جه ترشيحك لـ "بدل الحدوتة 3"؟

البداية كانت عند خالد الحلفاوي المخرج، هو كان بعتلي أكتر من مرة على فيسبوك إنه متابع شغلي وبيعجبه، وإن هنعمل حاجة مع بعض قريب، بعدها كلمني عشان دور في الحدوتة التالتة واتفقنا إني هعمله، شوية وكلموني عشان اجي وأمضي بس قالولي عايزينك في الأولى!

كلمت أيمن وتار المؤلف قالي ممكن عايزين ضيف شرف أو حاجة، ورحت على هذا الأساس، لكن لقيت إن كان فيه زميل هيعمل دور رمان واعتذر وعايزني فيه، بدأت اشتغل والناس اللي شغالين اتكلموا عني كويس في الإيديت، فعملت "يحيى" اللي هو بطولة الحدوتة التانية، وبعدها جت التالتة.

بس بعد كدة في الكواليس عرفت إن اللي كان رشحني وقالهم أراهن عليه كان هشام جمال المخرج.

- كان انطباعك إيه عن فكرة التلات حواديت؟

كان عاجبني الموضوع لأنه هترضي أكتر من ذوق، غير إنها تحدي لأي ممثل إنه لحد يوم عشرة المشاهد هيتفرج عليك في حاجة ويوم 11 هيشوفك في حاجة تانية.. ودة بالنسبة لي كنت مستمتع بيه.

- شايف نفسك عملت إيه من اللي كان نفسك فيه لحلم التمثيل؟

لسة ما عملتش أي حاجة.. أنا كل حاجة أنا عملتها راضي عنها جدًا.. اشتغلت مع ناس كتير طول عمري كان نفسي اشتغل معاهم، وبعتبر نفسي تعبت كتير بس أما بدأت، بدأت في حتة كويسة.. بس كطموح لسة ما عملتش حاجة من اللي كان نفسي أعملها.

- إيه أكتر نواع أدوار نفسك تعملها؟

أنا بحب أدوار الشر عشان كدة انبسطت جدًا في "كلبش".. فـ عايز أعمل شر، عايز أعمل "سايكو".. مش كله كوميدي، الكوميدي جميل وظريف وهو بيتي اللي برجعله بس أنا بحب الشغلانة وبحب استمتع بيها، فلازم أنوع.. وبكل أنانية أنا عايز أعمل حاجات كتير!

- مين أكتر حد استفدت منه في تجربة التمثيل الفترة اللي فاتت؟

كل واحد اشتغلت معاه استفدت منه حاجة، يعني مثلًا أستاذ الجندي المخرج من أكتر الناس اللي فادوني في حاجات لها علاقة بالكوميديا، وطبعًا دنيا! دي كانت مابتسبنيش أبدًا سواء في حاجات لها علاقة بالشغلانة من برة أو بالأداء.. فكلهم مفيش حد ما استفدتش منه.

- موقفك إيه من إعداد البرامج دلوقتي زي SNL أو المشاركة فيها؟

أنا مؤخرًا بقيت بعتذر عن أي حاجة فيها كتابة، يعني ما بكتبش غير لنفسي أو لعمل أنا فيه، لأن لا عندي وقت ولا طاقة.. وبأمانة يعني لو عندي إيفيه حلو هسيبه لنفسي!

- ممكن تستغنى عن السوشيال ميديا؟

أنا بدايتي عمومًا كانت من طرق كتير يعني كنت بكتب وبعمل كذا حاجة، بس اتجهت للسوشيال ميديا عشان ادخل الميديا بشكل أظرف، وبداية انتشاري وشهرتي كانت منها، فعمري ما هتخلى عنها، وطول الوقت حتى لو ما عنديش فيديو أعمله، بنزل بوست، كابشن، صورة، أو أي حاجة هزار أتفاعل بيها مع الناس، لأني بشوف إن هي اللي عملتني، وبشوف جمهورها مختلف عن جمهور التلفزيون.. مش أحسن ولا أوحش لكن مختلف!

- إفيه "علميًا وعمليًا" من فيلم "الكويسين" انتشر وبقى "ميم" على السوشيال ميديا.. قولنا حكايته كانت إيه؟ وكان في السكريبت من الأول؟

"إحنا بنبعد أوي يا عمي" و"إحنا بعيد أوي يا لطيف" دة كان في سكريبت أيمن وتار من الأول، لكن "علميًا وعمليًا" أنا اللي استأذنت وحطيتها، لأن الولد بيتكلم بشكل علمي طول الوقت لكن عارف إن الحقيقة حاجة تانية، فهو ولد "جيك" ولازم للأمانة العلمية يقول الصح وبعدين يرجع يصلحه، وأنا فاكر وقتها قولت لـ "فهمي" بعد اجتماع إن دة هيبقى كوميك وهفكرك.. وقد كان! 

- إيه اللي علق معاك من ردود الأفعال؟

إن كل عمل كان بيستهدف فئة معينة يعني مثلًا الأطفال والأمهات بيقولولي إحنا بنحبك عشان شوفناك مع "دنيا"، فئة تانية من الناس مختلفة هي اللي بتتفرج على "كلبش" ومبسوطة بيه، أما بروح الخليج مثلًا "SNL" بلاقي الناس كلها بتسألني عليه!

أنا ماكنتش قاصد ده، هي جت صدفة إن كل حاجة اشتركت فيها لها جمهور بتستهدفه فدة عمل تنوع.

- مين جمهورك المفضل؟

الأطفال طبعًا!

- إيه نقطة القوة ونقطة الضعف اللي لقيتها في أداءك؟

الضعف ممكن يبقى إني بتكلم بسرعة شوية فباكل الكلام ساعات ومحتاج أتمرن شوية.. القوة بقى مش بحب اتكلم عنها عشان هما كتير طبعًا!!

أعتقد نقطة القوة هي إن شغلي في "SNL" خلاني ما اهابش الممثل اللي بقف قدامه لأني مثلت مع معظم فنانين الوطن العربي وفي عرض مباشر قدام الناس.

- دة مش بيخليك تفكر في المسرح؟

دة أنا هموت! بس ييجي المسرح وأنا أمسمره هنا!!

- شغال على إيه حاليًا؟

بنكمل مسلسل عادل إمام "فلانتينو".. كنا داخلينه رمضان اللي فات وما كملش فهيتعرض في رمضان 2020.


 

Comments: