١٠ غلطات في علاقة "روس" و"ريتشل" في مسلسل "فريندز": ماتعملش زيهم

04/07/2019

أكيد في خلال الـ 10 مواسم بتوع Friends كل شخصية فيهم عدت بعلاقات كتير، لكن العلاقات اللي بيتبقى بين أبطال المسلسل هي اللي كانت متسلط عليها الضوء أكتر وأغلب الجمهور حبها واتأثر بيها زي مونيكا وتشاندلر اللي حبوا بعض واتجوزوا ولقوا حياتهم سوا، بس كان فيه علاقة تانية بين روس وريتشل كانت متعبة جدا، كل شوية يتصاحبوا ويفركشوا، وماكنوش بيتصاحبوا قد ما بيسيبوا بعض طول المسلسل.

خلينا نقولك غلطات كتير كانت في العلاقة دي:

1- رايتشيل وافقت على "البروبوزال" بتاع جوي: 

جوي لما بص في شنطة روس وخد الخاتم أول ما ريتشل شافته افتكرت إن جوي بيطلب منها إنها تتجوزه ووافقت على طول، ممكن يبقى آه هرمونات عشان الولادة زي ما هي قالت لكن الغريب إنها وافقت بسرعة جدا بالرغم إن مفيش قصة طويلة أو رومانسية بينها وبين جوي.

2- روس كدب على ريتشل لما قالها إنه طلقها وكان لسه متجوزها:

بعد ما اتجوزوا في لاس فيجاس وهما سكرانين وماكنوش في وعيهم، طلبت ريتشل إنها تتطلق لكن روس ماكنش موافق وده عشان هيبقى طلق للمرة التالتة بس مش أكتر.

3- ريتشل لقت وظيفة أحلامها في باريس:

في الغالب روس دايما كان حاسس إن شغله أهم من شغل ريتشل، وبمجرد ما دخلت في الشغل اللي بتحلم به نجحت جدا في شغلها واتعرض عليها وظيفة أحلامها في باريس، وبالرغم من كل ده قررت في النهاية إنها تتخلى عن كل ده عشان بتحب روس هي ماكنتش مجبرة على ده أصلا، بس ليه مش روس مثلا اللي راح معاها لباريس ودور على شغل هناك وفيه متاحف وجامعات كتير في باريس.

4- روس عمره ما اهتم بشغل ريتشل:

روس من الأول وهو عارف عايز يعمل إيه، يشتغل في علم الحفريات ويدرسه في الجامعة وغيره بس ريتشل خدت شوية وقت وبالرغم من كده نجحت جدا في شغلها وجتلها فرصة حلوة، فعملت إنجاز وكانت فاكرة إن روس هيبقى مهتم إن الست اللي بيحبها هتبقى ناجحة أو حققت أحلامها، لكن بدل من كده ماكنش مهتم أو كان بيسف عليها وعلى مجال الأزياء في المطلق كتير، لدرجة إنه لما راح معاها محاضرة بتخص شغلها نام.

5- روس كان بيحاول يمنع ريتشل من إنها "تديت" بعد ما سابوا بعض:

كانت مع فيبي وفيه راجل اديته رقم تليفونها في "بار" ولما اتصل بيها روس خد الرسالة وماقلهاش إلا لما واجهته بحقيقة إن فيه ست غريبة جت البيت، واللي زود الطين بله إنه زعق فيها وقالها إنه كان واخد باله من بنتهم وهي كانت خارجة في حين إنها كانت "سينجل" في الوقت ده وتقدر تدي رقمها لأي حد.

6- ريتشل سافرت لحد لندن عشان تمنع جواز روس:

ريتشل عملت الصح لما ماسفرتش الأول لفرح روس في لندن بس للأسف غلطت لما راحت عشان فرحه باظ وكانت هي السبب في ده وأدركت وقتها إنها لسه بتحبه، وكان عندها علامات إنها ماترحش لدرجة إن اللي كان راكب جنبها الطيارة قالها ماتقولش بس برضه قالت.

7- روس كان هيبطل يبقى صاحب ريتشل عشان إيميلي:

بعد ما روس نطق اسم ريتشل بالغلط في فرحة  من إيملي، فضل على اتصال بإيملي شوية عشان يرجعلها تاني وطلبت منه إنه يقطع علاقته بريتشل.

8- روس كان هيدخل في علاقة مع أخت ريتشل، وريتشل اتدخلت في الموضوع:

بالرغم إنهم كانوا في بريك وكل واحد فيهم يقدر "يديت" اللي هو عايز إلا إن ريتشل اتدخلت وانهت العلاقة دي، بالرغم إن اللي روس عامله غريب فعلا بس لا.

9- روس عمل مميزات وعيوب ريتشال:

عادي جدا إن الشخص يبقى بيستخدم عقله المنطقي ويشوف مميزات وعيوب الشخص اللي قدامه، بس روس لما عمل مميزات وعيوب ريتشل كتب إنها "وايتر" ومتدلعة، ولما جيه يعمل عيوب جولي كتب "هي مش ريتشل" وحاول يخبي الورقة من ريتشل كتير بس هي في الأخر لقيتها وقريتها.

10- ريتشل ماكنتش بتحترم شغل روس:

أغلب الناس كانت بتسخر من شغل روس وده عدم احترام حتى لما كانوا صحاب بس لما بقيت صاحبته كان روس بيقول خطاب في مؤتمر وهي وجوي فضلوا يضحكوا عليه، وده كان عدم احترام منها عشان هي كانت عارفة هو بيحب شغله ازاي وقد إيه هو مهم بالنسبة له.

Comments: