١٠ أسباب يخلوا إذاعة الأغاني محطتك المفضلة على الراديو

07/07/2019

كتبت: نوران عاطف

ليه ممكن تسمع الراديو بشكل عام مع إنك ممكن تشغل الأغنية اللي عايزها أي وقت وبكل سهولة وتعيدها بعدد المرات اللي إنت عايزها؟ لأن زي ما بيقول "يحيى" بطل فيلم "رسائل البحر" إن الموسيقى لازم يتعمل عشانها مجهود عشان تتسمع، ومن ناحية تانية الإذاعة بتساعدك تتخلص من الملل، بتفكرك بحاجات نسيتها أو زهقت منها، مش هتشغلها مخصوص بس أما تيجي هتبسطك!

طيب ليه تسمع إذاعة الأغاني (105.8) بشكل خاص؟

1- عدد البرامج في إذاعة الأغاني قليل والأغاني أكتر ومستمرة طول الوقت

2- دايمًا هتلاقي حد قبل أو بعد الأغنية بيقولك اسمها واسم المطرب والمؤلف والملحن

3- فيه مواعيد ثابتة لعدد من المطربين ممكن تفتح الراديو مخصوص وعارف إنك هتلاقيهم، زي فيروز الساعة 9 الصبح، عبد الوهاب الساعة 1 الضهر وبالليل في السهرة بعد أم كلثوم، وأم كلثوم نفسها الساعة 3 العصر، والساعة 11 بالليل، فريد الأطرش الساعة 5، عبد الحليم حافظ الساعة 7، ومحمد فوزي الساعة 9 بالليل

4- بيحتلفوا بأعياد ميلاد وذكرى وفاة جميع المطربين والمؤلفين والملحنين، لو عندك أي حد مفضل، فـ أي مناسبة تخصه هتكون فرح بالنسبة لك طول اليوم هتسمع تقريبًا كل أعماله

5- بتقدم تسجيلات وبرامج نادرة للموسيقيين والمطربين المصريين والعرب، خصوصًا في مناسباتهم واحتفالاتهم

6- كل برنامج أو قصة هتسمعها مرتبطة بأغنية أو لحن هتغير معناه وقيمته بالنسبة لك للأبد.

7- لو إنت من محبي الموسيقى فيه برامج متخصصة زي "غواص في بحر النغم" للفنان عمار الشريعي واللي هتثري ثقافتك الموسيقية وتكبرها

8- فكرة انتظار الأغنية المفضلة وإنت عارف إنها ممكن تيجي وفعلًا تيجي هتخليك إنت والإذاعة أصدقاء، هتحس بقيمة الأغنية وتستمتع بيها أكتر من اللي هتحسه أما تفتح وتشغلها

9- مفيش حفلات كاملة وطويلة غير في السهرة

10- مع الوقت هتسمع تسجيلات مختلفة لأغانيك المفضلة، وهتسمع نفس الأغنية في مناسبات مختلفة بدون قصد أو تخطيط منك، وهتبقى زي صديق قديم شوفته في موقف وفاجئك في موقف تاني مشابه بعد وقت، وفي أوقات تانية هتبقى إيحاء أو رسالة مستني تسمعها

على الرغم من إن "إذاعة الأغاني" أغلب مخزونها من تراث الأغاني العربية، إلا إنها مناسبة إنك تسمعها وتتعرف على العالم ده لو إنت ما تعرفش عنه حاجة، ولو إنت بالفعل مهتم وسميع هيبقى ده هو مكانك المناسب.

Comments: