حكاية بطل الشطرنج "باسم أمين".. أول مصري عربي أفريقي في قايمة الأفضل عالميا (حوار)

07/07/2019

كتبت: نوران عاطف

حياتنا مليانة بالحاجات اللي يمكن مش بنعملها بس عارفين إن "لها هيبة" وما ينفعش يعملها غير أشخاص مميزين وموهوبين ومجتهدين، عشان كدة تستحق إننا نعرف عنها أكتر ونخترق عالمها.

حاولنا نعرف أكتر عن عالم الشطرنج ولعيبته عن طريق باسم أمين، أول لاعب مصري وعربي وإفريقي في التاريخ يوصل لتصنيف الـ 33 على مستوى العالم.

1- كلمنا عن البداية، بدأت مع الشطرنج إمتى وإزاي؟

ابتديت وأنا تقريبًا خمس سنين، والدي هو اللي علمني، أنا بطبعي كنت طفل هادي مش زي الأطفال اللي بتتحرك كتير، وبحب الحاجات اللي فيها تفكير زي الـ Puzzle، ممكن اقعد ساعة ساعتين عشان احلها، فوالدي حس إن الشطرنج لعبة مناسبة ليا، جابلي شطرنج وعلمني وبدأ يلعب معايا، لحد ما في يوم وإحنا بنلعب رقعة الشطرنج وقعت واللي عليها اتقلب، وقالي مش مهم نلعب دور جديد، فقولتله لا أنا فاكر أماكن القطع!

انبهر إن فيه طفل عنده خمس سنين كان بيلعب بالتركيز دة وفاكر أماكن القطع، ومن ساعتها بدأ يجيبلي مدربين، الأول من جوة طنطا، وبعدين من القاهرة، لحد ما بدأت رحلتي مع البطولات.

2-أول ماتش في حياتك كان مع مين؟

أول بطولة كانت بطولة الجمهورية للناشئين تحت 12 سنة، كان تقريبًا عندي 6 سنين ونص ساعتها، ووصلت للمركز التاني.

بس من أوائل الماتشات اللي خلتني اتعرف بشكل كبير في مصر كانت بطولة الإسكندرية الدولية، كنت سبع سنين بردو وقتها، كنت أول جولة بلاعب أستاذ دولي اسمه يحيى عبد الرحمن، كان لاعب منتخب مصر أيامها، ونظام الشطرنج إن الدور ممكن يقعد لسبع وتمن ساعات، والماتش دة بدأ الساعة سبعة وفضل مستمر للساعة اتنين بالليل!

الموقف كان تعادل بس أنا كنت بنام طبعًا لأن الوقت متأخر على طفل في السن دة، وخسرت الماتش في الآخر، بس كانت من أهم الماتشات في البدايات.

3- كنت بتتمرن قد إيه في البداية وهي مجرد هواية، ودلوقتي قد إيه؟

وأنا صغير كان معظم التدريب أما بيكون فيه حد من المدربين موجود، لأن زمان ما كانش زي دلوقتي فيه نت وبرامج وكدة، كان الموضوع معتمد على القراية والكتب، فكنت لسة ما بقدرش أعمل دة، كنت لازم استنى حد من المدربين.

مع الوقت ولما كبرت بقيت بتدرب لوحدي مع وجود الكمبيوتر، أيام الدراسة والكلية كنت بحاول أوازن، لو فيه امتحانات بتبقى الأولوية لها، لو فيه بطولات ممكن أقعد من الصبح لحد بالليل بتدرب.

4- إزاي كنت بتوازن بين التفوق الدراسي والتمرين، التمرين واللعب كان بيستمر في أيام الدراسة؟

طبيعة لعبة الشطرنج ساعدتني على دة، يعني زي ما بعد سبع أو تمن ساعات اتمرن كنت بقدر أقعد زيهم أذاكر، خلاني تركيزي أكبر واستيعابي أسرع عشان أقدر أعوض اللي فاتني.

قدرت أجيب في الثانوية العامة 104% لأني كنت وقتها بطل إفريقيا للشباب فكان ليا حافز رياضي 7%، دخلت الطب والموازنة ماكانتش سهلة، كنت بحاول بس أنجح ما كنتش بحاول أجيب امتيازات مثلًا لأن دة كان هيأثر جدًا على تركيزي في الشطرنج، كنت مستمر في البطولات والسفر، بركز قبل شهر الامتحانات، لحد ما اتخرجت وكان لازم أخد قرار.

5- كان تخصصك إيه في الطب؟ واشتغلت فيه قد إيه؟

أنا اتخرجت في 2012، بعدها أخدت سنة الامتياز، وبعدين الجيش، خلصت في 2016، وكان لازم أختار وقتها، لأن الشغل غير الدراسة وهيبقى لازم أتفرغ لأن دي مسؤولية، كنت وقتها وصلت لمكانة عالمية كويسة، كنت بدأت أبقى من الـ100 الأوائل.

كان قرار صعب لكن أهلي شجعوني عليه، وفعلًا استقلت من وزارة الصحة في مارس 2016 واتفرغت للتدريب واللعب، وحصل بالفعل تقدم كبير في السنين دي.. أنا دلوقتي من الـ 33 على العالم، ودة أكبر مركز يوصله مصري أو أفريقي أو عربي في التاريخ.

6- أهم ماتش في حياتك كان مع مين؟ وليه اعتبرته الأهم؟

حاسس إنه لسة ما جاش! لسة ما لعبتش الماتش اللي أحس إنه تاريخي بالنسبة لي أو علامة فارقة.. أكيد في ماتشات أخدت بيها بطولات مهمة، بس أنا بردو حاسس إنه لسه.

7- أهم ماتش في البطولة الأخيرة؟ وأصعب ماتش؟

البطولة الأخيرة كانت في أبيدجان كانت بطولة قوية جدًا، لأنها كانت مع أفضل 9 لعيبة على مستوى العالم، ويمكن أهم ماتشات هي اللي كانت مع الأمريكي هيكارو ناكامورا، المصنف تاني عالميًا، وقدرت أغلبه مرتين واتعادل معاه مرة.

أصعب ماتش كان أول ماتش مع بطل العالم الحالي ماجنس كارلسون، وكان صعب نفسيًا لأن بيبقى فيه ضغط نفسي من إنك بتلاعب بطل العالم، دة غير إنها كانت أول مرة ألعب معاه، والموضوع بالفعل اتحسن في الماتش التاني وقدرت اتعادل معاه.

9- إيه طقوسك قبل أي مباراة؟ بتجهز نفسك إزاي؟

التحضير قبل المبارايات أو البطولات الكلاسيك اللي ببقى عارف هلاعب مين الماتش الجاي، قبلها بيوم مثلًا أو بساعات، بتفرج على ماتشات اللاعب واعرف طريقته والافتتاح اللي بيختاره، وعلى أساسه ببتدي أحضّر، وأشوف ممكن أعمل إيه يفاجئه وأجهز فكرة جديدة ما تكونش اتعملت قبل كده.. ودي من أصعب الحاجات في الشطرنج، واللي بنحتاج فيها مدرب في المرحلة دي من احتراف اللعبة.

على جانب تاني فيه تجهيزات بعيدة عن الشطرنج نفسه، زي الأكل قبل الماتش على الأقل بساعتين، وعمل أي رياضة أو حركة عشان أنشط الدورة الدموية قبل الماتش، وطبعًا النوم كويس.. الدور بيقعد سبع أو تمن ساعات فلازم يكون فيه لياقة بدنية كويسة.

خلال المبارايات لازم الواحد يشرب سكريات أو عصاير عشان يحافظ على تركيزه، لأن تركيزك لو قل بعد سبع ساعات وعملت نقلة غلط هتضيع الماتش كله!

10- بتفضل الشطرنج الخاطف أو السريع زي البطولة الأخيرة ولا الشطرنج الكلاسيك؟

بفضل الشطرنج الكلاسيك اللي الدور بيقعد فيه 7 أو 8 ساعات، هو دة اللي الواحد بيفكر فيه وبيطلع شطرنج مظبوط وأحسن أفكار عنده، وده اللي بيعتبروه المقياس الحقيقي للاعب وفهمه وإدراكه للعبة.

الشطرنج السريع أقل من ساعة، والخاطف أقل من ربع ساعة، وبيبقى ممتع أكتر للمشاهد، بس الأصلي واللي بيستمتع بيه اللاعب هو الكلاسيك.

11- مين مثلك الأعلى في اللعبة؟

كتير بس أهمهم الروسي جاري كاسبروف اللي كان بطل العالم لأكتر من 15 سنة، والأمريكي بوبي فيشر اللي كان مميز بأسلوبه الهجومي، الاتنين من أعظم اللاعبين في التاريخ، وشخصياتهم كمان مميزة جدًا.

12- بتشتغل على نفسك إزاي؟

إحنا في مصر للأسف ما عندناش مدرب أجنبي، ودي حاجة بننادي بيها طول الوقت، وعدم وجوده بيخلي الواحد يعمل مجهود زيادة لتعويض الإمكانيات اللي مش موجودة، فالتدريب بيبقى من خلال الكمبيوتر، البرامج المتخصصة، الإنترنت، والمواقع العالمية اللي بيلعب عليها كل لعيبة العالم.

بجانب التدريب لوحدي على مراحل لعبة الشطرنج، اللي هي الافتتاح، وسط اللعبة، والنهايات، كل جزء فيهم له تدريبات وكتب خاصة بيه.

14- عندك هوايات تانية غير الشطرنج؟

بحب العب تنس طاولة، وكورة بس مش كتير، بتابع الرياضة بشكل عام، وكرة القدم بشكل خاص، أنا في مصر زملكاوي، وخارجها "ليفربولي" عشان محمد صلاح.

ودة إلى جانب الشطرنج، أنا بستمتع بلعبه حتى لو مش تدريب، يعني بلعب الشطرنج الخاطف كتير من باب التسلية.

15- هدفك الجاي إيه؟

أنا حاليًا الـ 33 على مستوى العالم، وبحب أخد الموضوع خطوة خطوة، وهدفي الجاي إني أكون من العشرين الأوائل، ودة صعب لأنه عشان يحصل لازم أزيد 40 نقطة، والنقطة في المستوى العالي دة بتيجي بصعوبة شديدة، فبحاول اشتغل على نفسي عشان يكون فيه زيادة حتى لو بسيطة.

دة إلى جانب بطولة العالم للرجال، أنا لسة ما أتأهلتش لها.. أتمنى أتأهل ويكون فيه نتيجة مشرفة.










 

Comments: