قصة غرق عوامة "جولدز جيم": أحمال زايدة وإنقاذ شخص من الموت

07/07/2019

اتفاجئ رواد "جولدز جيم" اللي موجودة في عوامة راسية في مياه النيل في شارع النيل وبالتحديد قدام مجلس الدولة، بحركة غريبة وطلبات إخلاء للعوامة اللي غرقت في المياه ولسه مش عارفين لحد دلوقتي سبب الغرق، لكن دي نقط بتلخص الحادثة:

1- جولدز جيم ليه فروع كتيرة، لكن الفرع ده عبارة عن عوامة كبيرة قايمة بذاتها في مياه النيل، وجزء صغير من العوامة، ديسكو وكان مكانه قبل كده مطعم "روبي تيوزداي"

2- في أثناء غرق العوامة، رجال الإنقاذ النهري وصلوا، المكان كان تم إخلاؤه بالكامل، ماعدا شخص واحد كان موجود في أوضة مقفولة في الدور الأرضي

3- الإنقاذ النهري لحق الشخص اللي في الدور الأرضي قبل ما يغرق

4- الصور بتوضح إن السلم المؤدي للعوامة من شارع النيل نازل في المياه وجزء كبير من الدور الأرضي

5- اللي غرق من العوامة هو الدور الأرضي فقط لكن الجزء العلوي اتلحق

6- النيابة بدأت التحقيق في الواقعة، وملاك "جولدز جيم" بيتهموا مالك الديسكور الموجود في الدور الأرضي بإنه السبب في غرق العوامة

7- المعاينة المبدأية بتقول إن سبب الغرق، أحمال زايدة موجودة في الدور الأرضي

8- من ضمن الأحمال الزايدة اللي ظهرت في المعاينة هو بناء بعد الغرف بالرخام، ووجود معدات تقيلة

Comments: