حوار مع عميد "فنون جميلة": تفاصيل امتحان القدرات وطرق دخول الكلية

08/07/2019

أول إمبارح، بدأ طلاب الثانوية العامة في التوافد على كلية الفنون الجميلة جامعة الحلوان (مقرها في الزمالك) لأداء اختبار القدرات اللي بيؤهل لدخول الكلية، واللي مهما كانت نتيجتك في الثانوية العامة مش هتقدر تتدخل الكلية من غير ما تجيب على الأقل 70% في الامتحان، قابلنا دكتور سيد قنديل، عميد كلية الفنون الجميلة، واتكلمنا معاه عن اختبار القدرات والطرق المختلفة للالتحاق بالكلية، ومحتوى الدراسة، ومدى جاهزية الخريجين لسوق العمل:


* فكرة اختبار القدرات إلى حد ما جديدة علينا، إلى أي مدى الاختبار ده مهم لتحديد مدى توافق الطالب مع الكلية اللي داخلها؟

- اختبار القدرات هو المتطلب الأساسي قانونا لدخول الكلية، الناس فاهمة خطأ إن في مجموع، لأ مفيش مجموع في اختبار قدرات، اللي نجح في التنسيق وجاب درجة الكلية بيدخل يقدم للامتحان وبنفضل شغالين وبنقبل الطلبة لحد ما ناخد العدد اللي إحنا عايزينه، ممكن نقفل من المرحلة الأولى أو التانية أو التالتة في التنسيق، في النهاية اختبار القدرات هو البوابة.. ممكن حد يكون ناجح في الثانوية العامة لكن يفشل في اختبار القدرات ومايدخلش الكلية، والعكس غير صحيح، ماينفعش طالب غير ناجح في امتحانات الثانوية، ويدخل الكلية.

* اختبار القدرات مستمر من إمتى لإمتى؟

 - من 6 لـ 20 يوليو.

* والاختبار عبارة عن إيه بالظبط؟

- هما 3 اختبارات، الأول اختبار معلومات عامة ومعلومات في مجال التخصص، وبيتصحح إلكترونيا، وده من 30 درجة، واختبار تاني من 40 درجة للرسم بيتكلف فيه الطالب برسمة معينة بنقيس فيها قوة الخط والظل وتفاصيل تانية، والاختبار التالت من 30 درجة في التصميم، ولازم الطالب يجيب 70% أو أكتر عشان يجتاز الامتحان، والاختبارات التلاتة بتبقى في يوم واحد في خلال 5 ساعات.

* إيه أبرز حاجة بتواجه طالب فنون جميلة في سنته الأولى؟ هل بيبقى عنده تصور معين وبيتفاجئ بواقع مختلف؟

- الطالب اللي بيبقى عايز الكلية بيبقى عارف هي بتقدم إيه، وهو ده الطالب اللي بسعى ليه، إني آخد واحد هاوي وحابب الكلية وبيسيب مذاكرته عشان يقعد يرسم.

* هل الالتحاق بالكلية بيتطلب قدر ما من الموهبة عند الطالب، ولا المذاكرة والاجتهاد ممكن تعوض؟

- طبعا محتاجة موهبة، مش أي حد يجيب 70% في الامتحان اللي إحنا مصممينه، السنة اللي فاتت في اختبار القدرات نجح 16% بس من المتقدمين

* لو طالب مسافر بره لأي ظرف ومش قادر يحضر الامتحان لحد 20 يوليو، ممكن يمتحن بعدها أو يمتحن إلكترونيا؟ 

- هتبقى راحت عليه للأسف، اللي بيحدد الامتحان هو التنسيق مش إحنا، بيجيب استمارة من موقع التنسيق ويتمم دفع المصروفات ويتحدد له معاد يمتحن فيه، أنا ممكن أأجل الامتحان لأي طالب من يوم 10 ليوم 15 مثلا، لكن ماقدرش أعمل امتحان بعد يوم 20، لازم في حدود المدة دي.

* أحيانا بيبقى في لبس عند الطلبة، ندخل الكلية إزاي بالظبط من علمي ولا أدبي وإيه الأقسام المناسبة لكل شعبة؟

- عندنا  طريقين لدخول الكلية، إما امتحان فنون أو عمارة، عمارة لازم طالب علمي رياضة هيمتحن منظور هندسي ورسم ابتكاري وتشكيل ومعلومات في التخصص، وده بيبقى لوحده، الطريق التاني هو الفنون، بيدخله أدبي وعلمي علوم وعلمي رياضة بيطلع منه يدخل إعدادي فنون جميلة، وعموما الأدبي لازم يدخل فنون، عندنا في الفنون قسم الديكور هو تصميم العمارة الداخلية زي البيوت والمحال التجارية، وتصميم فنون تعبيرية هو تصميم ديكور المسرح والسينما، وعندنا أقسام وشعب تانية، بيدرس فيهم الطالب سنة إعدادي وبعدين يطلع سنة أولى يختار، إما نحت تماثيل ميدانية أو نحت بارز، أو شعبة عرايس، ده طبعا غير قسم التصوير (لوح أو تصوير جداري) وقسم الجرافيك اللي بيتكون من شعبتين، شعبة تصميمات مطبوعة أو illustration في المجلات أو أي حاجة بتخص الرسوم المنشورة، وفي شعبة الفن الكتابي، المتخصصة تصميم الكتب والأغلفة وحملات الدعاية زائد الرسوم المتحركة.

* هل قسم رسوم متحركة بيؤدي نفس دور الكورسات الخاصة اللي ممكن ياخدها أي حد بره وتؤهله لسوق العمل؟

- لا، قسم رسوم متحركة مش كورس، عندنا تصميم شخصية وستوري بورد وتصميم مفاتيح وفيها حجوم متحركة وصلصال ماينفعش كل ده يتاخد في كورس، إحنا بنديها في سنتين دلوقتي عايزين نخليها في 4 سنين.

* هل خريج فنون جميلة، متحقق في سوق العمل، ولا في مسافة بينه وبين اللي بيمارس بره؟

- أي شخص بيدرس في أي مجال حتى في الطب، لازم يبقى عنده مزاولة بره تعمل معادلة بينه وبين السوق، لازم يروح يقعد في شغل عملي وتحصل عملية تدريب، إنما الحمدلله الخريجين بتوعنا مطلوبين جدا 

* في وسط التطور الحاصل دلوقتي وظهور فنون معاصرة قايمة على الديجيتال والبرامج الحديثة، هل فنون زي النحت والتصوير ليها سوق عمل يستوعبها؟

- في العالم كله مازال الحس الإنساني موجود ومازال النحت والرسم موجود، زائد إننا عندنا أقسام تانية مش لوحة وتمثال بس، عندنا ديكور مسرح وسينما وديكور داخلي للمنازل، وعندنا قسم جرافيكس شامل التصميم والإعلان والرسوم المتحركة، وقسم زجاج معشق وشعبة عرايس، لكن اللوحة والتمثال لسه ليهم مكانتهم، زي الكتاب المطبوع.

* من وقت للتاني بنشوف تمثال في ميدان ما في محافظة ما، مشوه وسيء التصميم، إيه تعليقك؟

- دي ثقافة شعب ووعي فني، اللي بيعملوا بيفكر إنه كده بيجمله مش قاصد يشوهه، المفترض إن الأحياء ومجالس المدن هي اللي تعمل كونترول، وعلشان مانظلمش حد، ترميم التماثيل محتاج ميزانية ضخمة جدا، لكن الميادين العادية ممكن ياخدها مقاول يدهنها.

Comments: