١٧ معلومة عن الجواز مش هتعرفهم إلا بعد ما تتجوز

11/07/2019

زي ما أهلنا قالوا عن الجواز إنه "شر لابد منه" أو هو سنة الحياة فمهما كنت رافض الفكرة هييجي عليك وقت تعوزها أو تبقى مؤمن بيها أو تقتنع على الأقل بمزاجك أو بتأثير حد عليك، وعشان كده أغلب الناس بتتجوز مش كلهم، بس مش كل اللي بيتجوزوا عندهم فكرة صح عن الجواز.

أغلب الناس بتكون حالمة جدا وخيالية وحاسة إنها هتلاقي شريك روحها اللي هتعيش معاه في سعادة وسلام أبدي، وفيه ناس تانية منطقية جدا وبتحسب الخطوة بالورقة والقلم هتستفيد إيه وتخسر إيه، بس الحقيقي إن الحياة بعد الجواز مفاجأة لكل الناس لإنك بتواجه اختيارك ولكن فيه شوية أساسيات لاز تبقى عارفهم عن الجواز عشان ماتتفاجش بكل حاجة كده زي:

1- فيه أيام هضطر تنام فيها متضايق ومش طايق نفسك بس لمجرد إنك لازم تنام عشان عندك شغل تاني يوم بدرى وعندك مسؤولية 

2- هتبطل تنتقد أهلك خصوصا لو خلفت وبقيت إنت كمان أب أو بقيتي أم

3-  هتعرف إن الحب مش إحساس وإنه اختيار، لإنك كل يوم هتكمل فيه في الجوازة دي هتختار إنك تحب شريكك لإن الحياة مش سهلة زي ما ممكن تظهر لبعض الناس، حتى لو ماكنتش حاسس إنك بتحب شريكك النهاردة هتختار إنك تكمل معاه

4- كل ما تكبر في السن كل ما طاقتك هتقل

5- الناس بطبعهم محبطين، عشان كده خليك عارف إن في فترة حد هيخيب أمالك فيه أو هيخذلك عشان ماحدش كامل، ماتزعلش أكتر من اللازم على ده

6- اتعلم تطلب المساعدة عشان الجواز عبارة عن طرفين مش طرف واحد مش لازم تشيل المسؤولية كلها لوحدك ومش لازم تشيلها للطرف التاني لوحدة 

7- إنك تتعلم تتعذر

8- العلاقات ممكن ماتستمرش طول العمر وآخر العلاقات مش نهاية العالم

9- اشتغل على عيوبك بنفسك لإن الجواز مابيصلحش عيوب حد بالعكس المسؤوليات والحياة ممكن تخلي عيوبك تظهر أكتر، وإنت نفسك مش هتقدر تصلح عيوب شريكك إلا لو عايز يغيرها بنفسه

10- المقارنة أسوأ شيء ممكن تعمله في صالحك وفي صالح العلاقة، لإنك لو قارنت حياة الناس بحياتك خصوصا عن طريق السوشيال ميديا والصور وغيره مش هتكسب أبدا

12- الفلوس مهمة جدا في حياتكوا إنتوا الأتنين بس مش أهم عنصر، والماديات كمان بتبين معدن الشخص اللي معاك في العلاقة

13- هتقدر تقرأ أفكار الشخص اللي معاك كويس، ممكن ده يفزعه بس غالبا هتستمتع باللعبة دي جدا

14- التضحية جزء مهم في العلاقات وصحي كمان بس مش طول الوقت، بس أهم حاجة ترتب أولوياتك دايما 

15- الوقت والسنين والعمر بيجروا بسرعة حتى لو بان عكس كده

16- هتعرف تعمل ميزانية أو بادجيت معينة وتلتزم بيها بقيت الشهر غير لما كنت لوحدك كنت بتصرف فلوس وتبقي مش عارف صرفتها في إيه

17- مفيش جواز مثالي في الحياة، مع الوقت هتفهم كده أحسن وهتفهم معنى احتواء أخطاء غيرك، حتى ممكن تقبل شخير شريك وهو نايم

Comments: