٥ مراحل هتعدي بيهم في حياتك: أصعب من الثانوية العامة

14/07/2019

طول سنة الثانوية العامة بيبقى الشخص مش شايف غيرها وحاسس إنها أصعب حاجة في حياته، زي اللي غرقان في تفاصيل الحاجة ومش عارف إن في بعدها مراحل ممكن تبقى ألطف وممكن تبقى أصعب، وإنها مرحلة قصيرة جدا من عمر الشخص لأن مدتها سنة واحدة بس.

وعلى قد ما هي سنة مهمة جدا فعلا بتساهم في تحديد مصير البني آدم بنسبة ما ممكن تزيد أو تقل حسب الشخص ورغباته، إلا إنها مش أصعب سنة أو مرحلة في حياته، المراحل الجاية ممكن تبقى أصعب شويتين من الثانوية العامة:

1- طموحاتك والكلية اللي هتدخلها

أحلام الثانوية العامة وردية بشكل ما، مذاكرة كتير ورغبة غالبا مش مبنية على منطق، في دخول كلية تحقق فيها حلمك أو حلم أهلك، لكن المشكلة اللي بيقع فيها ناس كتير هي إنهم يدخلوا كلية أحلامهم ويتفاجئوا إن الكلية بتقدموا ليهم مش زي اللي كانوا متصورينه في أحلامهم الوردية أيام الثانوية، إما الكلية بتقدم محتوى نظري بزيادة وبعيد عن الممارسة، أو إن الكلية متعبة وشغلها كتير على عكس المتوقع، أو إن مجالات عمل الكلية ضيقة ونادرة، ساعتها بتبقى متورط تدرس 4 أو 5 سنين وأحيانا أكتر في كلية إنت مش راضي بيها.

2- أول 3 سنين في الشغل

بعد ما تتخرج وتلاقي فرصة الشغل، وتبقى راضي وحابب المجال اللي شغال فيه وعندك شغف كبير، هتتصدم بأول كام سنة في شغلك، إنت أصغر شخص في المؤسسة أو في الكيان اللي شغال فيه، الأقل خبرة، بتاخد أقل فلوس، حاسس إن في حاجات كتيرة ناقصاك عشان تبقى زي اللي حواليك في الخبرة والمكانة في الشغل

4- التحقق

المرحلة دي ممكن تواجهك لما تعدي مرحلة المستجد أو اللي جاي الشغل جديد أو قليل الخبرة، إنه يعدي وقت طويل وتحس إنك شخص غير متحقق، بمعنى إنك مش حاسس إن ليك بصمة أو دور أو حققت حاجة مهمة في كاريرك، التحقق ممكن ييجي من خلال الفلوس.. المنصب أو التايتل الوظيفي اللي وصلتله.. الجوايز اللي بتاخدها في شركتك أو مهنتك، إشادات اللي حواليك، الاعتراف بإنك مميز أو ليك دور مهم في الشغل، عدم التحقق بيسبب أزمة نفسية كبيرة للشخص

5- الـ Career Shift

أحيانا الكارير شيفت مش بيبقى اضطرار، ممكن جدا تكون ناجح في مجال ومتحقق فيه لكن تحب تجرب حاجة تانية من باب التجديد أو التحدي، لكن الكارير شيفت لو مرتبط بفشل وعدم تحقق في مجالك القديم بيبقى من أصعب مراحل حياتك، لأنك هتعيد فترة المستجد من تاني في مجال مختلف، إلا لو كان عندك خبرة سابقة من دراسة أو معارف أو أصحاب في المجال ده 

وفي النهاية، الثانوية العامة سنة صعبة ومصيرية فعلا، لكن في مراحل تانية كتيرة تستحق تهتم بيها وتحترمها وتخطط لها زي الثانوية العامة وأكتر، خلي بالك منهم من دلوقتي بقى.

Comments: