قصة نجاح الأول على الجمهورية علمي رياضة: بيعاني من التوحد

14/07/2019

زي الوقت ده من كل سنة الناس كلها بتبقى بتتكلم عن نتايج الثانوية العامة وخصوصا أوائل الثانوية لإنهم بيحققوا نجاح الكل لازم يحتفل به خصوصا لو اتغلبوا على مشاكل أو ظروف هما فيها وحققوا النجاح ده، وده اللي حصل السنة دي مع الأول في علمي رياضة دمج "مروان وحيد".

مروان هو الأول على الجمهورية في شعبة علمي رياضة دمج بمجموع 405 بما يعادل 98.9%، من قرية مشتول السوق في محافظة الشرقية، مروان بيعاني من مرض التوحد من عمر سنتين، والتوحد ماكنش عائق عشان يبقى شخص ناجح في دراسته بالشكل اللي وصله.

مروان هو الابن التالت والأصغر في أخواته وصرح والده إنه من السنة اللي فاتت وهو من المتفوقين وكان في المركز التاني في الترم الأول في تانية ثانوي، والمركز السابع في الترم التاني، وقال والده كمان إن فيه دكتور قاله إن مروان هيبقى في يوم من الأيام زي أينشتاين في حين إن دكتورة تانية قالت له إن مروان أخره ياخد دبلوم وتفكيره هيوقف، لكن وقتها هو اتحداها وفعلا ساعد ابنه يحقق حلمه.

وقال مروان في تصريحات صحفية إن مثله الأعلى في الحياة عو أخوه الكبير اللي حاصل على بكالوريوس تجارة، وإنه هيكتب أول رغبة من رغبات التنسيق له كلية هندسة، لإن هو نفسه يدرس هندسة معمارية

عموما تفوق مروان هو رسالة لكل أسرة عندها ابن من ذوى الاحتياجات الخاصة أو بيعاني من التوحد، وكل أسرة لازم تفهم طبيعة وخصوصية احتياجات ولادها عشان تحط ولادها على بداية الطريق الصح عشان يحقق أحلامه ويبني مستقبله بنفسه في وقت من الأوقات من غير ما يحتاجلهم.

Comments: