سارة عبدالرحمن: كنت زي "هبة" عندي اعتراضات كتير ومش عارفة عايزة إيه!

15/07/2019

كتبت: نوران عاطف

عفوية.. قادرة تعبر عن نفسها بشكل وافي ودقيق.. عندها إدراك كافي لنفسها ومكانها من كل حاجة حواليها، صفات ممكن تستشفها بسهولة من الكلام مع سارة عبدالرحمن، واللي بتخليك تعرف بسهولة ليه هي من أبرز أبناء جيلها اللي بتلاقي قطاع كبير من الشباب والكبار عارفينها وفاكرينها، رغم قلة عدد الأعمال اللي قدمتها.

اتكلمنا مع "سارة" عن حياتها وأفكارها وقراراتها اللي جاية ودي كانت إجاباتها.

1- في الوقت الحالي إيه مقاييسك لرفض أو قبول دور؟ وليه شوفتي دور"عليا" في "لهفة" ده مناسب ليكي؟

أنا بحب الحاجة اللي أعملها تبقى مختلفة ومش مكررة، والعمل نفسه يضيف جديد سواء للفن أو السوق أو المجتمع، دايمًا بحب الحاجة الفريش اللي ما اتعملتش قبل كدة.. عشان كدة حبيت فكرة إني ادخل حدوتة 10 حلقات، دة غير إني بحب "لهفة" من الأول، فكنت متحمسة إني أعمل الدور دة.

2- حلقات لهفة كانت بتتكلم عن السوشيال ميديا وعالم الـ influencers، هل دة بيعبر عن وجهة نظرك الشخصية في العالم دة؟

أنا مبسوطة إن كان فيه حاجة بتتكلم عن السوشيال ميديا وكنت شايفة إن فيه حاجة حقيقية جدًا في دة، وقد إيه فيه ناس بيبقى عندها هوس بالفولورز واللايكات، فأنا حاسة إني ممكن أبقى مع وجهة نظر المسلسل، لكن هل أنا مع وجهة نظر "عليا"؟ لا خالص!

3-  في حوار ليكي كنتي بتقول إنك لما دخلتي بلاتوه حسيتي هو دة العالم بتاعك اللي بتنتمي له، هل دة لسة شعورك بعد ما مشيتي شوية في عالم التمثيل؟

آه، أنا لسة حاسة كدة، لسة أما بدخل لوكيشين بحس إن دة المكان اللي برتاح فيه، يعني برتاح لنظام كل حاجة فيه، وحتى فيه عشوائية كدة بحبها بردو.

إنت أما بتدخل لوكيشن بتنسى الوقت! بتشتغل على بروجيكت وبتخرج وقت ما تخلص عشان تنام وترجع تكمل تاني.. فعلًا بحس إني مرتاحة فبقدر أطلع حاجات فيه تحدي إني أطلعها.

دة غير العلاقة اللي بتبنيها مع كل واحد في المكان لأنك بتشوفهم كل يوم لحد ما الشغل يخلص.. مجرد ما نتعود على بعض بيبقوا زي عيلتي وبيبقى الموضوع مسلي وجميل ومشجع.

4- وموقفك إيه دلوقتي من السوشيال ميديا وتقديم برامج عليها، التمثيل ممكن يخليكي تبعدي عنها؟

بالعكس، أنا ولائي الأول والأخير للإنترنت! واللي حاصل دلوقتي غريب يعني زمان كان اللي بيقدم حاجة أون لاين بيبقى عشان ياخد فرصة يطلع في التلفزيون، دلوقتي العكس اللي بيحصل، اللي في التلفزيون هما اللي عايزين يبقى لهم برامج على الإنترنت!

فبالعكس.. أنا متشوقة يعني لتقديم حاجة جديد على السوشيال ميديا.

5- بتحاول دايمًا تعبري عن فكرة مختلفة، زي فساتينك في المهرجانات، سواء عشان فكرة البلاستيك، أو إنك ممكن تشتري فساتين من الوكالة.. بتشوفي أفكارك دي الناس/ الوسط الفني بتستقبلها إزاي؟ هل بالشكل اللي انتي قاصداه ونفسك يشوفوه بيه؟

في الأول كان جديد إن حد يعبر عن أفكاره في الفساتين والمهرجانات والحاجات دي، وببقى عارفة إن اللي بعمله الآراء هتكون مختلفة عليه، فيه ناس هتحبه وناس لا.. رد فعل طبيعي ومتوقع وأنا مش بعمله عشان يعجب كل الناس.

الأفكار زي فساتين الوكالة أو البلاستيك هي تعبير عن نفسي وبتبقى حاجة مرضية جدًا ليا ودي أهم حاجة ليا في اللحظة دي.. بحاول على قد ما أقدر أوضح موقفي بس في وقت خلاص ببقى تمام يعني مع فكرة إني مش بدور على إن اللي بعمله يعجب كل الناس.

6- احكيلنا شوية عن حياة الشهرة، حياتك اتغيرت إزاي بعد ما بقى شكلك معروف لكل الناس تقريبًا؟ إيه الكويس إيه السيء؟

من أول يوم بدأت اتعرف فيه وأنا حاسة بفرق كبير في حياتي، يعني أنا لسة مش مشهورة لدرجة إن كل الناس تبقى عارفاني بس أما بدخل مكان وأبقى مش متوقعة يحصل حاجة وألاقي حد بيسلم عليا أو عارفني دة كان بيوترني في الأول وما ببقاش عارفة أقول إيه.

على جانب تاني الناس اللي حواليا كمان اتأثروا، يعني أسرتي مثلًا حصل فيها تغييرات كأن فيه مولود جديد بنتكلم عنه طول الوقت.

الجانب السيء بقى إن بيبقى فيه عزلة كدة نتيجة الصورة المتصدرة عنك، يعني ممكن الصورة دي تقول إنك تمام بس إنت مش تمام، حتى الناس القريبة منك بتصدق دة! بيبقى حلو إنك تسمع حد بيسألك بجد إنت عامل إيه؟

بس عمومًا أنا شايفة إنه تمن قليل قصاد الإيجابيات.. أنا كل يوم بحمد ربنا على اللي وصلتله.

7- إيه اللي بتحاولي تحافظي عليه في حياتك ضد التغيير دة؟

طول الوقت بحاول أحافظ على إحساسي بذاتي واستقراري النفسي، لأن الشهرة في ظل المفاهيم المتعارف عليها إن النجاح عامل إزاي والفشل عامل إزاي، بتخلي سهل إن الواحد ينساق ورا المفاهيم دي ويفرح أوي ويزعل أوي ويفضل طول الوقت يرقص بين الطرفين دول.

أنا بحاول طول الوقت ما اتأثرش أوي، وأبقى على الأرض في مكان ثابت عشان الحاجات دي ما تهزنيش سواء بالسلب أو بالإيجاب.

8- أكتر خطوة بتعتزي بيها في حياتك حتى الآن؟

على المستوى الشخصي، كان فيه وقت عندي فرص وحاجات مهمة بتحصل في حياتي، في نفس الوقت بابا كان مريض، فكنت في اختيار بين الفرص دي وبين بابا واخترته! ساعتها حتى ماكانتش علاقتي بيه كويس أوي، وأخدت القرار كدة عمياني، وكان أهم قرار أخدته في حياتي.

في حياتي المهنية بقى أكتر حاجة بعتز بيها إني حتى الآن ثابتة على موقفي، ودة بحترمه في نفسي بصراحة.. في أوقات كنت ببقى محتاجة شغل جدًا وكان بيجيلي شغل مش متناسب مع أفكاري أو مش شايفاه كويس وماكانتش بعمله عشان الفلوس.. دي حاجة بعتز بيها بس مش عارفة هتكمل لإمتى!

8-  أكتر شخصية عملتيها بتحبيها؟

أنا بحب "هبة" في "سابع جار" جدًا واتعلمت منها كتير، بس أعتقد عشان قعدت معاها 60 حلقة، أعتقد لو "عليا" في "لهفة" كنت قعدت معاها أكتر من 10 حلقات كانت الدنيا هتفرق.

9- دور اتعمل قبل كدة وتتخيلي نفسك تقدري تعمليه؟

مش عارفة.. بس عايزين ندخل في أدوار الشر بقى.

10- احكيلنا عن نشاطك في مجال البيئة زي التشجيع على إعادة التدوير أو الاستغناء عن البلاستيك، بدأ إزاي؟ وبتعملي إيه حاليًا يخصه؟

الموضوع علم وإدراك يعني، أما الواحد بيعرف أضرار البلاستيك بيبدأ يقلله ودي حاجة مريحة، حاليًا نشاطي هو سلوكي اليومي يعني بفصل الزبالة، ما باخدش أكياس بلاستيك، ما بشتريش حاجة جديدة إلا للضرورة جدًا، بحاول دايمًا اجيب مستعمل.

11- ختاري صفة من كل شخصية عملتيها عشان توصفي شخصيتك، شبه كل واحدة فيهم فإيه؟

"علا" في "ألف مبروك" اللي عايزة يبقى عندها عالمها وأوضتها وكمبيوترها، أنا بحب الخصوصية، "هبة" في "سابع جار" قعدت كتير حاسة إني شبهها فإني عندي اعتراضات كتير بس مش عارفة أنا عايزة إيه؟!، "عليا" في "لهفة" عندها حتى كدة حقانية وعارفة الحق فين، يعني عمرها ما اتبلت على "لهفة" هي كانت دايمًا بتغلط.

12- مين فنانينك المفضلين الفترة دي؟ ممثلين أو مطربين

أنا بحب أوي ماجد الكدواني، بحس إنه مثال للممثل الشاطر اللي بيعرف يعمل أي حاجة، كوميدي، دراما، دايمًا على طبيعته.

وبحب أوي مطربين جيلي، يسرا الهواري وأبيوسيف، بحس إن هما بيتعبوا جدًا وبيعملوا حاجة مهمة، كفاية إنهم بيعبروا عننا!

13- أكتر نقد فني اتقالك وشوفتيه في محله؟ 

لما حد بيقولي إني على طبيعتي لأني فعلاً بحاول أبقى كدة، وأما حد بيقولي ما تكرريش نفسك ودة صح.

13- أكتر نقد كان مزعج؟

لما حد بيقولي حاجة على شكلي أو طريقة كلامي، ما ببقاش عارفة يعني اشتغل عليهم أعمل إيه!

14- هدفك القريب الجاي إيه؟ شغالة على إيه حاليًا؟

أنا بحاول أتعلم الكتابة لأني نفسي أكتب فيلم.. دة اللي بستثمر فيه حاليًا، وفي انتظار نزول فيلم "الكنز 2" قريب.









 

Comments: