إزاي تعرف البطيخة حمرا ولا قرعة؟

15/07/2019

من قبل اختراع التكييف أو المروحة، كان فيه تكييف طبيعي، والملجأ الآمن في أيام الحر، وهو الفاكهة الصيفية وعلى رأسهم البطيخ.

بس استخدام البطيخة كمثال يحتذى بيه لأثر الحظ على حياتنا وتحكمه فيها ماجاش من فراغ، لأن بالفعل البطيخ يعتبر أكتر فاكهة محتاجة خبير عشان تختار الثمرة المناسبة، وزي ما طعمها الحلو جالب للسعادة، طعمها الوحش ممكن يبقى مصدر تكدير، خصوصًا إنك في الكمية اللي بتجيبها كلها موجودة جوة البطيخة الواحدة، ويا كسبتها كلها يا خسرتها كلها!

عشان كدة جمعنالك أهم النصايح اللي هتساعدك تختار البطيخة الحمرا، يدويًا أو باستخدام التكنولوجيا.

1- شكل البطيخة

اختار البطيخة اللي شكلها منتظم من برة ومافيهاش خدوش أو جروح، لأن وجودهم معناه إنها اتعرضت لشمس وميه كتير، واللي ممكن يتسبب في فسادها.

2- وزن البطيخة

سواء كبيرة أو صغيرة، لازم تحافظ على إنك تختار الأتقل، لأن التقل معناها إن جواها مية أكتر، ودة دليل على نضجها أكتر.

3- لون البطيخة

لازم لون البطيخة يكون معتدل بين مش غامق جدًا ومش فاتح.

4- صوت الخبط

خبط على البطيخة وكل ما كان صوتها مكتوم دة معناه إنها مستوية أكتر، وكل ما كان الصوت رنان معناه إنها مش كويسة.

5- الجزء الأصفر

الجزء الفاتح دة هو المكان اللي بترتكز عليه البطيخة وهي بتستوي، وكل ما كان لونها أميل للأصفر دة معناه إنها كويسة، وكل ما كانت فاتحة أكتر ورايحة للون الأبيض دة معناه إنها مش كويسة أوي.

6- الأبلكيشنز (التطبيقات)

ممكن تنزل على موبايل أبلكيشن هيساعدك عشان تعرف البطيخة مستوية وحمرا ولالا، زي "بطيختي" و"Melonaire".

Comments: