ليه هتزور الهرم المنحني بعد افتتاحه لأول مرة من 1960؟

16/07/2019

افتتحت وزارة الآثار يوم السبت 16 يوليو الهرم المنحني بمنطقة دهشور، واللي بيعود للملك سنفرو مؤسس الأسرة الرابعة في عصر الدولة القديمة، واللي بيتفتح للزيارة لأول مرة من سنة 1960، بعد فترة طويلة من الغلق للترميمات.

1- ليه الهرم دة مهم؟

الهرم دة هو واحد من أول المحاولات اللي اتعملت في مصر من ملوك الدولة القديمة للوصول لأفضل طريقة لبناء مقبرة على شكل هرمي، بشكل سليم، وبالفعل كان أخر محاولة فيها مشكلة، وبعده اتبنى "الهرم الأحمر" في نفس المنطقة، أول هرم متكامل.

2- ليه اتسمى بالهرم المائل أو المنحني؟

لأن تم بناءه بزاوية 58 درجة لحد تقريبًا نص ارتفاعه، بعدها تم تغيير الميل وبقى 43 درجة، لأن اختيار زاوية كبيرة من البداية اتسبب في صعوبة تكملة الجزء العلوي منه، ودة اللي فادهم في الوصول للتكنيك السليم لبناء هرم متكامل.

3- الترميم عمل إيه للمكان؟

الترميم شمل الهرم المائل، وهرم الـ كا العقائدي، وقاموا فيه بعمل سلالم داخلية وخارجية للهرمين، مشايات لسهولة الحركة، وشبكات إضاءة، بجانب تدعيم أحجار الممرات، وترميم غرفة الدفن في الهرم المائل.

4- ممكن تزور إيه تاني في المكان لو رحت هناك؟

أول ملك استغل منطقة دهشور كان الملك سنفرو عشان يعمل مجموعة جنائزية له واللي فيها مقبرة ملكية، ومعابد لعمل شعائر الدفن والعبادة، فـ بني الهرم المائل ومجموعته اللي باقي منها المعبد الجنائزي، وبعدين الهرم الأحمر اللي كان أول مقبرة هرمية سليمة ومتكاملة واختارها سنفرو عشان تبقى مقبرته، واللي في الغالب باقي المجموعة اختفت تحت الأراضي الزراعية المحيطة.

5- إيه فايدة زيارة الأهرامات؟

الأهرامات هي المقابر الملكية في عصر الدولة القديمة والوسطى، لحد ما بطلوا يبنوا مقابرهم فوق الأرض، وأصبحت تحت الأرض، عشان تبقى بعيدة عن عين وإيد حرامية المقابر، واللي بالفعل نهبوا مقابر كتير بسرقة المومياوات، أو المقتنيات الدهبية اللي بتكون موجودة فيها، واللي بيحطها الملك عشان يستخدمها ويستمتع بيها في الحياة الأخرى حسب معتقده.

 وبجانب بناءها الضخم والمبهر، غرف الدفن والمعابد الملحقة بيها بيكون فيها نقوش أو رسومات بتحكي كتير عن العصر اللي اتبنت فيه وتقاليده ومفاهيمه.



 

Comments: