أصنافك المفضلة هتنقرض قريب: الشاي والقهوة والشوكولاتة والبطاطس

17/07/2019

كل محصول زراعي بيبقى محتاج أجواء معينة عشان ينمو فيها، درجة حرارة ودرجة رطوبة وطبيعة خاصة للتربة ونوع أمطار بعينه، وبالضرورة تغير عامل واحد أو أكتر من العوامل دي بيأثر -غالبا بالسلب- على المحصول وزراعته، وبما إن العالم بيشهد تزايد الاحتباس الحراري يوم بعد يوم، فارتفاع درجات الحرارة في العالم كله هتأثر على كتير من المحاصيل، ومنها طبعا المحاصيل المفضلة لينا كلنا:

1- القهوة

حسب تقرير مطول لـ BCC فالاحتباس الحراري هيتسبب في تقليل مساحات الأراضي اللي بتتزرع فيها القهوة للنص في سنة 2050 ودي طبعا نسبة مرعبة، اللي أكتر من كده كمان، إن بعض حبوب القهوة هتختفي تماما من العالم في سنة 2080، الدليل الملموس على المعلومات دي إن تنزانيا، وهي أكبر وأهم مصدر قهوة في العالم، انخفض محصولها للنص في آخر 50 سنة.

2- الشاي

مزارع الشاي بتنمو بسبب الأمطار الموسمية، ومع زيادة الأمطار، بيتأثر المحصول ونكهة الشاي نفسها، فلو فاكر إنك هتبدل القهوة بالشاي كمصدر للكافيين، نحب نبشرك، العب غيرها.

3- الشوكولاتة

حبوب الكاكاو محتاجة درجة حرارة مرتفعة مع قلة الرطوبة، وبالتالي أي تغير في درجات الحرارة أو معدل الأمطار هيأثر بالسلب على المحصول، وعشان كده المزارعين في إندونيسيا سابوا زراعة الكاكاو لصالح زراعة زيت النخيل وأشجار المطاط، BBC قالت إن درجات الحرارة في غانا وساحل العاج هترتفع خلال السنين الجاية درجتين تقريبا، والدولتين دول بيصدروا تلتين إنتاج العالم من الكاكاو.

4- السمك

ارتفاع درجات الحرارة بتسبب انخفاض معدلات الأكسجين في المحيطات، وده اللي أدى لإن حجم السمك بقى أقلق بشكل كبير الفترة اللي فاتت، الدليل على تأثر السمك بالاحتباس الحراري، إن حصة الصيد في العالم كله انخفضت بنسبة 5%، وانخفضت التلت في بحر الشمال.

5- البطاطس

المحصول المحبب لينا كلنا، صديقنا في الاكتئاب وأكلتنا السريعة مهددة هي كمان بسبب ارتفاع درجات الحرارة، موجات الجفاف في بريطانيا سنة 2018 اتسببت في انخفاض محصول البطاطس الربع، ده غير إن حجم ثمرة البطاطس الواحدة انخفض 3 سنتيمتر.

Comments: