تفسير أكتر 10 كوابيس بيشوفها البشر في حياتهم

18/07/2019

في الفترة اللي بيزيد فيها الكوابيس عند الشخص بيقل فيها نومه تلقائي وبيعاني من الأرق، بس الفكرة إن الكوابيس غالبا بتكون بسبب القلق أو التوتر، لكن عموما ساعات الكوابيس بتكون بسبب حاجة معينة في أحداث يومك أو مستوحاة من أحداث حياتك بسبب عقلك الباطن، وأوقات تانية فيه كوابيس بتيجي لكل الناس في العالم زي ما قال موقع yourtango، وهما:

1- حلم العناكب:

تفسير الحلم: إن حد من الناس القريبة منك وغالبا حد من أهلك وغالبا الأم أكتر بيكون بيحب نفسه جدا ومسيطر على حياتك عن طريق إنه ناسج شبكة على حياتك، وبتحس إن ده مش إنت في مواقف كتير، أو ممكن تبقى بتحاول تبعد عن نفسك أو عن أشياء مغرية بالنسبة لك.

التفسير العلمي للحلم: 10% من الناس عموما بيعانوا من هلوسة الأحلام في مرحلة ما في حياتهم، وحلم العناكب هو واحد من أكتر الهلاوس المنتشرة، وغالبا الشخص اللي بيحلم بالحلم ده بيحس كأنه حقيقي كأنه سامع وشايف العناكب بجد.

2- حلم الغرق أو المد والجزر:

تفسير الحلم: البحر والمحيطات وغيرهم بيمثلوا العواطف، فلو الحلم ده بيتكرر معاك فإنت غرقان في عواطفك، وغالبا ما بتشعر بالإرهاق وعندك مشاكل كتير في حياتك الفترة دي وبتواجه صعوبة في مواكبة الأحداث.

التفسير العلمي للحلم: معنى الحلم إنك بتواجه صعوبة في التنفس وإنت نايم، وممكن يبقى نفسك بيوقف لما بتنام، أو بيجيلك تشنج عضلي وإنت نايم أو لما بتروح في النوم.

3- الحلم بالوقوع:

تفسير الحلم: معنى الحلم إنك حاسس بالفشل أو الوضع الحالي في حياتك سئ، وبتحس إنك فاقد السيطرة على حياتك، أو إنت في حته سيئة مش عارف تطلع منها مرة تانية 

التفسير العلمي: معناه إن ممكن تبقى بتعاني من شد عضلي أو رعشة خفيفة، أو ممكن يبقى بسبب مرور سائل في الأذن الداخلية.

4- حلم إن سنانك بتقع:

تفسير الحلم: معنى الحلم إن عندك صعوبة في التعبير عن نفسك أو اللي إنت بتحس به، وغالبا ما بيكون علامة على الشعور بعدم الأمان أو الأهتمام بصورة نفسك جدا، وممكن يبقى معناه إنك ماسك العصاية من النص في حاجات كتير في حياتك ومش عايز تاخد قرار فيها، وحاسس إنك مش عارف تسيطر على الموقف.

التفسير العلمي: التفسير العلمي لفرويد بيقول إن الحلم ده معناه إن الشخص بيحب نفسه جدا، لكن علميا الحلم ده معناه إنك حاسس بالقلق.

5- حلم إن حد بيطاردك:

تفسير الحلم: ده معناه إنك بتحس بالعجز في مواقف معينة، أو عايز تهرب من مشكلة ممكن تواجها، ولو الحلم بيتكرر دايما فإنت بتتجنب حاجة خايف منها أو مؤلمة بالنسبة لك، وممكن دي تبقى علامة إنك تبدأ تحل مشاكلك اللي خايف منها.

التفسير العلمي: لما عملوا دراسة على ألف شخص ألماني لقوا إن الحلم ده عند نسبة 26% منهم.

6- حلم إنك اتأخرت:

تفسير الحلم: عندك حاجات كتير في حياتك وغرقان فيها، وحاسس كأنك فوت فرصة مهمة في حياتك، أو ممكن تبقى حاسس إنك مش مستعد أو بتواجه تغييرات مهمة في حياتك ومش عارف تتأقلم معاها.

التفسير العلمي: وفي نفس الدراسة اللي كانت على ألف شخص ألماني لقوا إن 24% من الأشخاص بيعانوا من الحلم ده.

7- حلم إنك اتجمدت:

تفسير الحلم: معناه إن فيه حاجة في حياتك تم رفضها أو تم قمعك بشكل ما، وممكن بيدل برضه على إن مشاعرك باردة أكتر من اللازم.

التفسير العلمي: ده غالبا بيكون نتيجة النوم الغير مستقر، ومن زمان تم ذكر مفهوم "شلل النوم" والعلم بيفسر التجمد ده إنه شلل النوم، تقريبا 5% من الناس في العالم بيعانوا من شلل النوم.

8- حلم إنك عريان في الشارع:

تفسير الحلم: إنك بتعاني من القلق أو إنك مش حاسس إنك عارف تبقى نفسك فعلا، ومعناه إنك حاسس بضعف شديد.

التفسير العلمي: الأحلام اللي دوافعها بتكون القلق من أكتر الأحلام المنتشرة، وواجها من 60 لـ 70 % من الناس في العالم.

9- حلم إنك مت:

تفسير الحلم: ده بيدل على إن فيه تغيير كبير بيحصل في حياتك أو على وشك الحدوث، وغالبا ما بيكون رمز إيجابي لبداية حياة جديدة، أو اكتشاف نفسك أو حدوث تغييرات داخلية، أو ممكن تبقى بترمز لحدوث نهايات في حياتك زي النهايات العاطفية أو شغل.

التفسير العلمي: لو حد مهم في حياتك مات، فالتجربة دي هتفضل سبب إنك تفضل مفزوع، وغالبا هي طريقة عقلك عشان يتغلب على الصدمة والحزن.

10- حلم الامتحان:

تفسير الحلم: إنت قلقان من فكرة النجاح أو الفشل، وقلقان من إنك ماتقدرش تهتم بمسؤولياتك الحالية.

التفسير العلمي: بيعتقد العلماء إن ده بيحصل لما الدماغ بتبدأ تخزن معلومات، وده السبب اللي بيخلي الحلم ده منتشر بين الناس اللي بتذاكر أو بتدرس عموما.

Comments: