إيه حكاية "المنطقة 51" والكائنات الفضائية اللي فيها؟

19/07/2019

"area 51" أو "المنطقة 51" هي قاعدة عسكرية أمريكية في ولاية نيفادا بالولايات المتحدة، وعلى مر السنين كان بيطلع عليها إشاعات إنها مقر تجمع للكائنات الفضائية، وبيتعمل فيها تجارب خارقة للطبيعة وفيها بقايا أطباق طايرة!

النظريات دي كان مصدرها واحد اسمه "بوب لازار"، اللي طلع سنة 1989 في مقابلة تلفزيونية وقال الكلام دة، بحجة إنه فيزيائي اشتغل جوة القاعدة، واللي فتح الموضوع مرة تانية هو فيلم وثائقي باسمه وعن حكايته نزل على "نتفلكس" بالإضافة لظهوره في برنامج إذاعي مع "جو روغان".

بعدها بدأت دعوة على "فيسبوك" عشان تجمع الناس لاقتحام القاعدة دي يوم 20 سبتمبر، لمقابلة الكائنات الفضائية الموجودة هناك، وبقى فيه إيفنت اسمه "Storm Area 51" أو "اقتحام المنطقة 51" والغريب إن الإيفنت قدر يجمع ناس بسرعة صاروخية، لحد ما وصل النهاردة لمليون شخص عايز يروح، وبيتفقوا على مكان المقابلة وطريقة الدخول "لو جرينا زي "ناروتو" – شخصية كارتونية خارقة- هنقدر نقتحم زي الرصاصة"، بالإضافة لأن التطبيق "سناب شات" عمل "فلتر" جديد على شكل كائنات فضائية ومكتوب عليها "We're coming" "احنا جايين".

التزايد الكبير والحماس أثار مخاوف الحكومة الأمريكية، واللي أعلنت فورًا إنها مستعدة للدفاع على مناطقها العسكرية، وإن أي حد يقرب هيتقتل، عشان كدة صاحب الفكرة والدعوة من الأول طلع رد وقال "دي نكتة وأنا مش ناوي أنفذ حاجة من دي، أنا بس اعتقدت إنها هتكون حاجة دمها خفيف تجمعلي معجبين على الإنترنت".

Comments: