أسوأ 10 حلقات من مسلسل "فريندز" بتقييم الجمهور

21/07/2019

“فريندز" مسلسل عابر للقارات وللزمن، فعلى الرغم من إنه مسلسل اجتماعي متشبع بالثقافة الأمريكية وابن فترة التسعينات وأول الألفينات إلا إنه نجح إنه يوصل لمكانة مهمة عند أجيال مختلفة أصغر وأكبر، ومن مختلف بقاع العالم وثقافاته، وبناء على أعداد التقييم على موقع IMDB حدد موقع "Screenrant" أكتر 10 حلقات أخدوا تقييم قليل، وعملوا قايمة بأسوأ عشر حلقات للمسلسل، واللي هما من الأعلى للأقل:

1- حلقة رجوع "ريتشل" لخطيبها

الحلقة 20 من الموسم الأول، واللي أخدت تقييم 8/10، كانت هي الحلقة اللي رجعت فيها لخطيبها "باري" واللي هربت منه قبل كدة يوم الفرح، وفي الوقت دة كان على علاقة بصديقتها المقربة.

وهي نفسها الحلقة اللي كان فيها "تشاندلر" في انتظار مكالمة من بنت كان معجب بيها، ومتوتر بسبب دة.

2- حلقة "مونيكا" المزيفة

الحلقة 21 من نفس الموسم، وفي الحلقة دي اتسرق كارت البنك بتاع "مونيكا"، وكان فيه واحدة تانية بالفعل بتستخدمه كأنها هي، وبعد محاولات تتبع من "مونيكا" للشخص اللي سرقها، لقيتها واحدة بتعمل كل الحاجات اللي كان نفسها تجربها وتعملها، وبقوا أصدقاء لحد ما اتقبض عليها.

على جانب تاني كانت دي حلقة وداع "روس" لـ"مارسيل" القرد بتاعه، ويمكن عدم اهتمام الجمهور باللحظة دي، هو اللي خلى تقييم الحلقة 8/10.

3- حلقة البقعة

الحلقة السابعة من الموسم التامن، واللي بيعين فيها "تشاندلر" واحدة عشان تساعد "مونيكا" في تنضيف البيت، وعلى الرغم من شطارة البنت، إلا إن "مونيكا" بتشك إنها بتسرق هدومها وتلبسها، وبتدور الحلقة حوالين محاولاتها إنها تتأكد من دة.

في نفس الحلقة بتبدأ "فيبي" تقابل الخطيب السابق لأختها التوأم، واللي مش قادر يفرق بينهم، وينساها ويتعامل مع "فيبي" كشخص مستقل.

4- حلقة "فيبي" لما قابلت صديقتها القديمة

الحلقة 14 من الموسم التالت واللي ظهرت فيها شريكة سابقة لـ"فيبي" في الشغل، بتحاول ترجعها تاني للشغل والغنا مع بعض، في البداية "فيبي" بترفض ومش بتكون مبسوطة وبعدين بيرجعوا يغنوا مع بعض، لكن شريكتها بتقرر إنها تاخد "smelly cat" أغنية "فيبي" الرئيسية وتستخدمها في إعلان تلفزيوني.

من ناحية تانية كان "تشاندلر" بدأ يخرج مع حبيبة "جوي" السابقة، واللي بيكتشف إن عندها رجل صناعية، الحلقة تقييمها 7.9/10

5- حلقة المتبرع

الحلقة 22 من الموسم التاسع، بعد ما "مونيكا" و"تشاندلر" عرفوا إنهم مش هيقدروا يخلفوا بشكل طبيعي، وبدأو يفكروا في متبرع يساعدهم في إتمام العملية، جاب "تشاندلر" موظف معاه في الشركة، شاف إنه فيه صفات مثالية تصلح إنها تكون جينات لأولاده، والزيارة اتحولت لمقابلة شخصية تشبه مقابلة الحصول على وظيفة.

6- حلقة "الكريسماس" في "تولسا"

الحلقة 10 من الموسم التاسع، وفيها "تشاندلر" بيضطر إنه يقضي "الكريسماس" في "تولسا" الولاية اللي اتنقل شغله لها، في حين "مونيكا" بتعتقد إنه فيه علاقة بينه وبين حد هناك.

الحلقة عبارة عن فلاش باك لذكريات الأصدقاء الستة في أعياد "الكريسماس" اللي فاتت، وفي النهاية بيسيب "تشاندلر" شغله وبيرجع يقضي العيد مع أصدقاءه ومراته، الحلقة تقييمها 7.6/10.

7- حلقة اللقاء الصحفي مع "جوي"

الحلقة 19 من الموسم التامن، وفيها بييجي لـ"جوي" فرصة عمل لقاء صحفي في مجلة مهمة خاصة بالمسلسلات التلفزيونية، بعد ما عمل لقاء قبلها بوقت اتسبب في خروجه من المسلسل نهائي بسبب تصريحاته اللي ضايقت الكاتب.

"جوي" بيطلب من أصدقاءه المساعدة والتوجيه من خلال إنهم يقعدوا جنبه وهو بيتكلم مع الصحفية، ويتدخلوا في الوقت المناسب، الحلقة عبارة عن فلاش باك لأهم مراحل حياة "جوي" وشغله، وتقييمها 7.5/10.

8- حلقة "ماك آند تشيز"

الحلقة 20 من الموسم السادس، وفيها بينسى "تشاندلر" يكتب معاد اختبار الأداء لـ"جوي" لمسلسل "ماك آند تشيز" واللي هيأهله لدور بطولة بيعمل فيه شخصية محقق والمساعد بتاعه إنسان آلي.

الحلقة تقييمها 7.5/10.

9- حلقة العهود

من الواضح إن حلقات الفلاش باك هي الأقل متعة للمشاهدين، في الحلقة 21 من الموسم السابع، بيكتب "تشاندلر" و"مونيكا" عهود الجواز اللي هيقولها لبعض يوم الزفاف، وبيفتكروا خلال الحلقة ومحاولاتهم للكتابة كل اللحظات المهمة بينهم لحد يوم الزفاف.

10- حلقة الدعوة

الحلقة 21 من الموسم الرابع هي الأسوأ في رأي الجمهور بتقييم 7.3، وهي اللي بتيجي فيها الدعوة لزفاف "روس" على "إيميلي"، وبتفتكر فيه "ريتشل" ذكرياتها مع حبيبها السابق، وبتفكر إذا كانت لسة عندها مشاعر له والمفروض تسافر لندن تقوله دة ولا لا.

Comments: