١٣ سبب يخلوك ماتستخدمش Tinder في مصر!

21/07/2019

"تندر" هو واحد من أشهر الـ Dating Apps في العالم اللي من خلاله أي شخص ممكن يتعرف على بنت/ولد لو حصل بينهم Match فيبدأوا يتكلموا وتبدأ العلاقة بينهم واللي بتنتهي أحياناً بإنهم يتقابلوا وأحيان أخرى (كتييييرة) بإنهم مابيتقابلوش، وزي ما كل حاجة في ليها شكل مختلف عندنا، فاحنا جمعنالكم 12 سبب يخلوك ماتستخدمش Tinder في مصر!

1- لو إنت ولد فللأسف حظك هيبقى سيء ومش هتلاقي بنات عامليلنك Match كتير غير مرة واحدة كل 3 شهور إلا لو إنت آسر ياسين.


2- ولو إنت آسر ياسين فعلاً، واتعمل لك Matches كتيرة الحمدلله..هتلاقي البنات مابيردوش على الرسايل اللي بتبعتها لأسباب لا يعلموها هما شخصياً.


3- لو إنتي بنت فحظك هيبقى حلو، هتلاقي Matches كتيرة جداً لأن الشاب من كتر ماهو فاقد الأمل بيعمل Swipe right لأي أكونت هيقابله حتى لو أكونت مرات خاله.


4- الناس بيختاروا أحلى كام صورة ليهم (واللي غالبا مابتبقاش شبههم) وبيحطوها، فلو حظك كان سعيد ووصلت لمرحلة إنك خلاص هتنزل تقابلهم في Date، فحظك مش سعيد أوي لأنك هتتفاجيء بشكلهم في الحقيقة.
 

5- بتقابل ناس كتيرة حاطين صورهم مع أصحابهم ومابتبقاش عارف إنت بتكلم مين فيهم بالظبط! بس غالباً دي بتبقى إشارة خفية مدلولها إنك لو لو عاوز تقابلهم فهتقابلهم وهما مع أصحابهم، أو اعمللي Match وهتاخد صاحبي هدية! وبتفضل تركز في الصور عشان تلاقي مين هو الشخص المشترك في كل الصور عشان ده أكيد صاحب الأكونت.
 

6- مش حاطين صورهم مع أصحابهم فبيبقوا حاطين صور مناظر طبيعية أو متعلقاتهم الشخصية زي كلابهم أو قططهم أو بعض أطراف أجسامهم زي أصابع إيديهم أو شكل سنانهم، ودي يا إما معناها إنهم مكسوفين يحطوا صورهم، أو بيتارجتوا الناس اللي عندها فيتشات مريبة.
 

7- ناس كتيرة عليه مش فاهمين الغرض الأساسي للأبلكيشن رغم إنه الأبلكيشن معرف نفسه بإنه Dating app إلا إن هتلاقي ناس عليه داخلين كاتبين إنهم بيدوروا على Friends بس!.. حاجة كده زي أما تروح حفلة لعمرو دياب وتلاقي فريق "واما".
 

8- بنات كتير بيبقوا عاملينه عشان بس يشوفوا مين هيعملهم Match أو تقيس كام واحد ممكن يعجب بيها، كأنها بتعمل "قياس نِفس" أو زي لما بنعمل Pilot لمنتج أو مشروع قبل ماينزل أو يتنفذ على أرض الواقع، وده يمكن يكون تفسير للنقطة رقم 2.
 

9- في الناحية التانية بعض الشباب بيعاملوه كأنه بيت دعارة إلكتروني، بيبقوا حاطين صورهم Topless أو بالبوكسرات القطونيل، وبيكتبوا أرقام موبايلاتهم في الـ Bio.
 

10- هتلاقي عليه ناس متجوزين وكاتبين إنهم متجوزين أو حاطين صورهم مع شريكهم، فيبدأ ضميرك يصحى ويقولك هتتعرف عليهم فعلاً؟ وهتساهم في خيانتهم لشريكهم؟ وتبدأ تتخيل نفسك مكان الفنانة نجلاء بدر في دور الخاينة اللي بتعمله في كل مسلسلاتها.
 

11- بعيداً عن باقي الحاجات اللي مش حقيقية..هتقابل ناس كتيرة مابتكتبش أعمارها الحقيقة، فبتبقى عامل حسابك إنك نازل تقابل فتاة عشرينية فاتنة فتتفاجيء إنك قاعد مع بنت هربانة من حصة الأحياء في مدرسة جمال عبد الناصر الثانوية بنات.
 

12- الناس بيكتبوا قصة حياتهم في الـ bio ودي حاجة حلوة عشان بتبقى عارف هم بيفكروا إزاي وإيه آرائهم في الحياة.. بس الحاجة المش حلوة إن الكلام ده كله كدب.
 

13- هيجيبلك الناس القريبين منك في المنطقة لأنه بيظهرلك كل الأكونتس اللي على بُعد أقصاه 100 ميل، كان هيبقى أحسن لو بيخليك تشوف ناس في أماكن أبعد عشان تكتشف وجوه جديدة بدل ما تفتح كل شوية تلاقي محمد أنور اللي بيقف في البلكونة اللي في وشكم ليل نهار.

Comments: