١٠ حاجات هتقنعك إن الصيف أحسن من الشتا

22/07/2019

الصيف فصل مختلف عليه والكلام عنه شائك، بعض الناس بتوصل إنها تحطه في مكانة الحروب والمجاعات، والبعض الآخر بيحاول يعبر حبه له بتحفظ شديد أو بأسلوب الخايف والحاسس إنه بيعمل حاجة غلط، بس لأن بالفعل لكل فصل عيوبه ومميزاته جمعنا أهم مميزات الصيف اللي محتاج تركز معاها وما تضيعش عليك فرصة الاستمتاع بيها.

1- الألوان المبهجة

لبس الصيف أو أدواته أو حتى إعلاناته كلها بتتميز بالألوان الفاتحة والمبهجة، واللي بتفرق في شكلك ونفسيتك ومودك العام.

2- لبس خفيف

في الصيف هتستمتع بالحاجة اللي بيحرمك منها الشتا، وهي إن لبسك يبقى خفيف وما تضطرش لاستخدام طبقات كتير عشان تدفى.

3-هتروح البحر

نزول البحر أو حتى القاعدة على الشاطيء بتفرق كتير سواء في حالتك النفسية أو في الطاقة اللي بتطلعها، في الصيف بيبقى عندك إمكانية تغيير الجو والاستمتاع بحالة الفصلان المؤقت قبل رجوعك مرة تانية لروتينك العادي.

4- سهولة الحركة

البرد والشتا بيصعب الحركة حرفيًا، طول ما جسمك ساقع بتبقى دايمًا حاسس إنك ما عندكش طاقة ومش قادر تعمل حاجة، بجانب الأمطار أو العواصف اللي ممكن تمنع حركتك قهريًا حتى لو إنك دفيان، في حين الصيف بيوفرلك سهولة الحركة في أي وقت.

5- اليوم طويل

النهار في الصيف الطويل واللي بيحسسك دايمًا إن لسة اليوم معاك خصوصًا لو شغلك بيخلص الساعة خمسة أو ستة، بجانب إن العالم كله بيسهر أكتر بالليل، عكس الشتا اللي الشوارع بتقفل نسبيًا بدري.

6- السفر

السفر في الصيف مش محتاج تروح مكان بعيد عنك كتير أو مكلف عشان تغير جو، أي بلد فيها بحر هتكون ألطف وأخف من المكان اللي مفيهوش، في حين في الشتا محتاج تروح بعيد بحيث يبقى الجو فعلاً مختلف أو أدفى من المنطقة اللي إنت فيها.

7- حاجات بيبقى لها طعم أكتر

إنت ممكن تشرب عصير في الشتا أو تاكل أيس كريم، تستحمى بمية ساقعة، لكن حرارة الصيف بتدي للحاجات دي معنى وبتخلي متعتها أكبر.

8- فاكهة الصيف

من أهم مميزات الصيف هي فاكهته، الصيف فيه البطيخ، المانجا، العنب بأنواعه، الكنتالوب، الشمام، التين، الخوخ، والبرقوق.

9- مهرجانات الصيف

الصيف فصل الحفلات في الهواء الطلق، واللي بقة جهات ثقافية كتير دلوقتي بتهتم إنها تعمل برنامج قوي كل سنة، فيه أهم نجوم وفرق للموسم.

10- مواصلات أفضل

مفيش مدارس.. مفيش كليات، مهما كنت بتعاني فخلال الدراسة المعاناة بتكون أضعاف.

Comments: