١٠ كتب "Page turner" تقراها في وقت فراغك

22/07/2019

كتبت: نوران عاطف

أغلب الناس اللي مش بتحب القراية، فاكرين إنها فعل ممل أو محتاج مجهود كبير هيقدموه أما يتوفر عندهم، واللي بيحبوها هيفضلوا وجود ليستة كتب مخصصة لأوقات الاسترخاء، كتب "Page turner" أو صفحاته  بتتقلب بسرعة، سواء بسبب سلاسة الأحداث وتشويقها، أو بساطة اللغة، عشان كدة هنرشحلك هنا 10 كتب ساهلين لو إنت قاريء قوي، وما يضيعوش وقتك على الفاضي لو إنت جامد في القراية.

1- رواية الباب المفتوح

رواية للكاتبة لطيفة الزيات واللي اتعمل عنها الفيلم الشهير اللي له نفس الاسم وبطولة فاتن حمامة وصالح سليم، الرواية لطيفة متشابهة مع الأحداث اللي جت في الفيلم، لكن بتفاصيل وتوسع أكتر.

2- رواية الرحلة

من روايات رضوى عاشور اللي بتنسج فيها حدوتة من سيرتها الذاتية، وهنا بتحكي فترة سفرها لبعثة دراسية برة مصر بعد جوازها بوقت بسيط، ونشاطها الاجتماعي والسياسي بجانب تعليمها، لحد وصول جوزها الشاعر مريد البرغوثي عشان يعيش معاها.

3- كتاب إذاعة الأغاني

عادة كتب عمر طاهر ممكن تحت القايمة كلها، لأن كلها بتتسم بالأسلوب البسيط، والتأثير الكثيف، اللي بيديك إضافة أدبية وثقافية، وهنا بيتكلم عن علاقته بإذاعة الأغاني، وبيحكي ذكريات متفرقة له من خلال الأغاني اللي ارتبطت بيها.

الكتاب أشبه بالقصص القصيرة، ومناسب للناس اللي مش بتحب تحس إنها مضطرة هتقرا وقت طويل من غير فواصل.

4- رواية كالماء للشيكولاتة

رواية مكسيكية للكاتبة  لاورا إسكيبيل، واتحولت لفيلم أسباني سنة 1989، وبتحكي قصة رقيقة عن بنت بتحب واحد، مامتها ما رضيتش إنهم يتجوزوا بسبب تقاليد قديمة إن البنت الصغيرة لازم تفضل تراعي مامتها لحد ما تموت، فالولد بيتجوز أختها.

البنت محبة جدًا للطبخ والوصفات اللي اتعلمتها من جدتها، وبتحكي القصة ومشاعرها كلها من خلال الطبخات ومكوناتها.

5-رواية بليغ

للكاتب طلال فيصل، وبتحكي قصة حياة الملحن بليغ حمدي بناء على أوراق بخط إيده سابها في مراحل مختلفة في حياته، بجانب خيال الكاتب وتوظيفه للأحداث والمادة اللي في إيده.

الرواية مناسبة لمحبي الأغاني القديمة اللي أكيد هيكون فيها مساهمة كبيرة من أغاني بليغ، لأن معرفة حكايات مرتبطة بكل لحن، وقصة كل أغنية هيديها معنى وروح جديدة تمامًا.

6- كتاب "فاتن حمامة" 

كتاب للصحفية زينب عبد الرازق، بتجمع فيه كل حواراتها مع الفنانة فاتن حمامة، واللي كانت قليلة الظهور الإعلامي جدًا.

الكتاب ممتع لأنه بيجمع حوارات وكل حكاياته على لسان "فاتن" نفسها مش حكايات عنها، ودة بيساعد في رسم صورة حقيقية للفترة دي كلها فنيًا واجتماعيًا وسياسيًا مش بس لحياتها، بجانب جزء مخصص لحوارات مع مشاهير الفن بتسألهم "عبدالرازق" عن "فاتن".

7- أنا فلليني

مناسب لمحبي السير الذاتية، لأن بيحكي قصة حياة المخرج الإيطالي فيديريكو فلـّـيني، واللي بالفعل دسمة بالأحداث والدراما حتى لو إنت ما تعرفش أبطالها، بالإضافة لتواجد ترجمات جيدة جدًا بلغة سلسة.

الكتاب بيقدم قصة حياة المخرج الإيطالي عن طريق تجميع لحوارات مطولة عملتها معاه الصحفية الألمانية شارلوت شاندلر.

8- يوم غائم في البر الغربي

للكاتب محمد المنسي القنديل، هي نسج روائي لمراحل مختلفة من تاريخ مصر الفرعوني والحديث، بيظهر فيها شخصيات مختلفة زي  هوارد كارتر واللورد كرومر وعبد الرحمن الرافعي، من خلال قصة بنت مسلمة بتهرب بيها والدتها في بداية الرواية من عمها بعد وفاة جوزها، وبتسيبها قدام دير تتربى فيه.

10- كافكا على الشاطيء

هاروكي ماروكامي كاتب حديث الوجود نسبيًا، لكن أعماله كلها بتنقلك لعالم تاني طول فترة قرايتك لها، وبتبلور في دماغك فكرة في النهاية بتوصلها بس من مدى اندماجك مع الحدث واستيعابك له، وبيراهن بشكل كبير على إدراك وخيال القاريء.

Comments: