١٠ حاجات تهون عليك الانتظار وإنت مسافر

24/07/2019

مواقف تأخير القطر، الأتوبيس، أو الانتظار في العربية لحد ما الناس اللي مستنيهم يجوا، بتحصل طول الوقت خصوصًا لو مسافر، بتكون مضطر تستنى نص ساعة أو ساعة، عشان كدة هنرشحلك هنا حاجات ممكن تعملها في الوقت دة عشان يمر بسرعة.

1- تصفح الأخبار

التطبيقات زي "نبض" أو "أخبار العالم"، "Opera News"، "CNN"، "BBC" هتجمعلك اللي بيحصل في الدنيا، وهتمر على الأخبار وإنت ماسك الموبايل، واللي مش بس بتبقى مقتصرة على السياسة، هتلاقي تقارير اجتماعية وفنية لطيفة ومن كل مكان في العالم.

2- اقر أو اسمع كتاب

لو إنت من محبي القراية خلي معاك دايمًا كتاب تستخدمه في الحالات دي، وحاول تخليه في الغالب رواية ما تحتاجش منك تركيز كبير أو بحث عن ألفاظ جديدة، هتسرح مع أحداثها لحد ما الوقت يعدي.

لو مفيش معاك كتاب تقدر تتجه للكتب الصوتية واللي متوفرة دلوقتي على "يوتيوب"، "ساوند كلاود" وعدد من التطبيقات المخصصة للهدف للنوع دة من الكتب بأكتر من قارئ وتقدر تختار الصوت اللي ترتاحله.

3- لعب العقل

خلي على موبايلك ألعاب زي شطرنج، سودوكو، أو الكلمات المتقاطعة، مجرد ما تبدأ تفكر وتندمج هتلاقي الوقت عدا.

4- قوي لغتك

لو بتتعلم أي لغة جديدة، حاول تبص حواليك وتقول لنفسك اسم كل حاجة باللغة دي، والمشترك بينها وبين أي لغة تانية، وممكن تغير لغة موبابلك للغة دي وتتصفحه وتتعرف على المصطلحات الجديدة.

5- أغاني حماسية/ مناسبة للجو

اسمع الأغاني اللي بتثير حماستك وبهجتك وبتخليك تتخيل نفسك في أماكن تانية بترقص أو بتغني، أو بتفكرك بذكريات حلوة، من ناحية تانية لو إنت في مكان هادي أو نقي، ممكن تسمع موسيقى بس أو أغاني قديمة مناسبة للطقس.

6- خطط لرحلتك

لو مسافر فكر هتعمل إيه أول ما توصل وهتقسم أيامك إزاي، راجع الحاجات اللي أخدتها واللي معتمد إنك هتجيبها أول ما توصل، نزل تطبيق "Sticky note" واكتب اللي محتاج تشتريه أو محتاج تفكر نفسك تعمله عشان يفضل قدامك وما تنساش مع زحمة السفر والوصول.

7- اتكلم مع الناس

في الغالب اللي مستنيين حواليك بيمروا بنفس حالتك ورايحين نفس المكان، ودة هيخلي بينكوا مادة حوار لبداية صداقة عابرة وتبادل الكلام لحد ما الوقت يعدي.

8- الأكل والشرب

اشتري أكل أو روح لأقرب مطعم، واشرب بعدها مشروبك الروتيني، دة هياخد جزء كبير من الوقت وهيديك طاقة أكبر ويهدي أعصابك.

9- اتفرج على مسلسلاتك

لو إنت من مشتركي "نتفلكس" أو أي تطبيق مشابه له، افتكر تحمل الحلقات أو الفيلم اللي عايز تشوفه على موبايلك، دة هيساعدك في الانتظار وفي السكة، ولو مش مشترك في حاجة افتكر تنقل حلقاتك على الموبايل أو اللاب توب.

10- اكتب مذكراتك

حتى لو إنت مش من هواة الكتابة أو مش كويس فيها، أكتب أفكارك حتى لو بشكل عشوائي، إحساسك ناحية المكان اللي إنت فيه، وأحلامك عن الرحلة اللي رايحها، والأشخاص اللي كنت تتمنى يبقوا معاك.


 

Comments: