ليه محتاج تجرب تسافر لوحدك؟

24/07/2019

السفر هو المتعة والحلم الأكبر عند معظم الناس، بس زي ما واحدة من متع السفر الأساسية هي الناس اللي بتسافر معاها سواء أصحابك أو أهلك، زي ما فيه لحظة ما لازم تيجي عندها وتقرر إنك تسافر لوحدك، وحسب موقع "Insider" تجربة السفر المنفرد بتساعد على نضجك وفوايدها بتغير حياتك للأبد، عشان كدة جمعنالك هنا الفوايد دي زي ما ذكرها الموقع.

- لما تعمل أي حاجة بنفسك بتحس أكتر بالحرية

من المعروف إن أي رحلة مع أصحابك لازم يكون فيها على الأقل ساعتين نقاش واختلاف على كل خطوة هتعملوها، كل واحد عنده خطط وخيال عن الرحلة، حاجات عايز يعملها، وحتت عايز يروحها بقية الناس مش مهتمين بيها والعكس صحيح.

على جانب تاني أما تكون لوحدك هتقدر تتحكم في وقتك زي ما أنت عايز، تصحى زي ما تحب، تنام زي ما تحب، تاكل اللي إنت عايزه، وتزور الأماكن اللي فعلًا مهتم بيها.. الاختيار كله هيكون ليك.

- هتطلع من المنقطة الآمنة بتاعتك "الكومفرت زون"

لو تهت أو حصلت معاك أي مشكلة وإنت مع أصحابك، مهما كنت بعيد عن بلدك وأماكنك اللي تعرفها كويس، هتحس بالأمان بوجودهم، لكن تعرضك لموقف وإنت لوحدك هيحطك في اختبار حقيقي لنفسك، ويجبرك تستجمع شجاعتك وتصلح الأمور لوحدك.

في الوقت دة هتشوف إنت هتتعامل إزاي مع الموقف لوحدك؟ هتقدر تتواصل مع الناس والمجتمع ولالا؟ مهما كان دة مخيف عشان فيه خروج من منطقتك الآمنة، هيديك قوة وثقة كبيرة في نفسك بعد كدة.

- هتاخد فرصة ترتاح فعلًا

عادة السفر مع الأصدقاء بيكون "فرهدة" عشان الزحمة بتشجع على الحركة الكتير و"الهيبرة" وكل واحد عايز يزور مكان فالباقي بيشاركه، ودة بيضيع أهم هدف من السفر وهو "الاسترخاء".

لما تكون لوحدك هيكون في إيدك بردو إنك تقضي اليوم كله تتفسح، لكن كمان ماحدش هيلومك لو ما عملتش أي حاجة غير النوم والأكل في أوضتك، والنزول لأقرب مكان للاستمتاع بتغيير الجو بس.

-هتاخد فرصة تكتشف نفسك بشكل حقيقي أكتر

الوقت اللي هتقضيه لوحدك معتمد تمامًا على اختياراتك الشخصية، واللحظات اللي هتقضيها في فسحك وزياراتك لمتحف أو مطعم أو أي حاجة من المعالم السياحية، هتكون مكثفة أكتر وهتركز فيها عشان تحس بتأثيرها فعلاً عليك وإحساسك بيها.

في النهاية دي حاجة مش هتحس بيها غير أما تجربها، إدي نفسك فرصة تفصل، وتسرح مع أفكارك وخيالك كام يوم، وخلي دة نوع من إبداء الحب لنفسك وتقديرها.

Comments: