٦ حاجات هتتعلمها من العلاقات اللي فشلت في حياتك

24/07/2019

الشخص طول ما هو بيتعامل مع حد تاني حتى لو مش قريب منه فالمفهوم والمصطلح اللي بيتم ذكره على التعامل والتواصل بين الشخصين ده اسمه علاقة، حتى لو كانت مجرد صداقة أو أقل، فالطبيعي إننا طول ما بنحتك بناس في يومنا فاحنا كده اسمنا بنعمل علاقات، بس للأسف مش كل العلاقات دايمه، بغض النظر عن العلاقات الأسرية والعائلية، لكن في علاقات الصداقة وعلاقات الإرتباط وعلاقات المعرفة العامة لازم تبقى عارف إن فيه احتمالية كبيرة إن العلاقات دي تبوظ أو تنتهي في أي وقت، لكن مع إنتهاء كل علاقة في حياتك غالبا هتطلع بشوية دروس مستفادة منها زي:

1- إنت أهم شخص في حياتك:

اعرف دايما إن إنت أهم شخص في أحداث حياتك، حتى لو كان الشخص اللي في العلاقة اللي معاك بيحسسك بده، بعيد عنه فإنت محتاج تبقى إنت بتهتم بنفسك، لإن لو مش إنت اللي هتفهم ده أو إنت اللي هتهم بنفسك محدش هيعمل ده، لإن في الغالب الناس كويسين جدا في الكلام فلو فضلت تقدملهم على أساس كلامهم مش هتلاقي حاجة لنفسك.

2- خد قرارات ماتتخانقش كتير:

طبيعي جدا في علاقتك بأي حد هتختلفوا أو هيكون فيه قفش، بس اللي هتتعلمه من العلاقات بعد كده إنك محتاج في الأوقات دي تتناقش مع الشخص اللي قدامك وتوصلوا لأرض وسط عشان الزعيق والخناق مالوش أي لازمة، وخليك فاكر إنك لازم تبقى مؤدب ومحترم في مناقشتك دي، لإن الكلام لما بيطلع مابتعرفش ترجعه تاني.

3- خليك نفسك:

لو فعلا مش حاسس إن ده إنت قدام الشخص اللي بتتعامل معاه، فإنت كده شخص مدعي ودي مشكلة أكبر إنك بتمثل على نفسك وعليه، ده غير إنك مش هتعرف تعيش بالشخص المزيف اللي إنت عليه ده طول عمرك، ولو الشخص اللي قدامك مش عارف يتقبلك بالسئ والحلو اللي فيك فهو فعلا مايستهلكش.

4- هتعرف قيمة إنك تقدم وتاخد:

احنا كبشر أغلبنا أنانيين عشان كده بنلاقي صعوبة جدا في فكرة العطاء خصوصا لو فيه بين الطرفيين مشاكل وخناقات، وهتعرف كمان إنك لو مش قادر تهندل العلاقة دي يا هتقدم يا هتاخد بس.

5- هتتعلم تبقى أهدى وصبور ومرن أكتر:

بعد فترة هتتعلم من العلاقات اللي باظت إنك تتحكم في مشاعرك، خصوصا لو الطرف التانى اللى بتتعامل معاه كان شخص عصبي، لكن ده لو عرفت تتحكم في نفسك لإن ممكن العلاقات اللي فيها الطرف التاني عصبي تخليك عدواني.

6- هتتعلم تتخطي الحاجات والناس:

إنك تتعلم تتخطي الأشياء والناس دي مهارة صعبة في العموم، لإنك بتتعلم إزاي تتحكم في عقلك وعواطفك، وبتتعلم إزاي تتحكم في قوة إرادتك.

Comments: