١٠حاجات ممكن يبوظوا علاقتك العاطفية بدون قصد

25/07/2019

كل علاقة بتمر بمراحل مختلفة، أوقات كويسة وأوقات وحشة، مشاكل عابرة كبيرة وصغيرة، منها التقليدي اللي كل الناس بتمر بيه ومنها اللي ممكن يكون مرتبط بظروف علاقتك إنت بس، ومشاكلك ممكن ما تبقاش هي نهاية العلاقة، لكن تصرفات معينة بتعملها بحسن نية أو بدون انتباه ممكن تبقى هي السبب.

موقع "Insider" جمع التصرفات دي واللي ممكن تبقى دليل إن علاقتك في مشكلة.

1- إنك تبعد نفسك عن شريكك

ناس كتير بتخاف من إن مشاعرها تنجرح أو إنها تبقى تقيلة على الطرف التاني، فبياخدوا جنب ويبعدوا شريكهم عن أي مشاكل أو لغبطة في مشاعرهم، ودة في الغالب بيؤدي للاللي كنت خايف إنه يحصل من الأول لو حكيت، وهو عدم الرضا عن العلاقة والبعد بين الطرفين، وحلها إنك تحاول دايمًا تحكي في كل حاجة وتشارك مشاعرك وأفكارك، لأن في أحيان كتير بيكون الطرف التاني بيمر بنفس المشاكل.

2- رفض التجارب الجديدة

أثبتت الدراسات إن الثانئيات اللي بتجرب حاجات جديدة مع بعض بيكونوا أقرب وأسعد، والعكس صحيح، رفضك لرغبة شريكك في اكتشاف اهتمامات مشتركة جديدة وتجربة حاجة مختلفة بتعمل غضب وضغينة وملل بين الطرفين، عشان كدة ما ترفض اقتراحات شريكك بإنكوا تطلعوا رحلة أو تجربوا مطعم أو تعملوا هواية جديدة.

3- الصمت

فيه ناس ما بتحبش الكلام كتير، بس في العلاقات العاطفية ومع وجود طرف غضبان أو بيضغط بشكل ما ومش بيستقبل غير صمت أو عدم تعليق، دة بيعمل فجوة كبيرة في التفاهم بين الطرفين وبيخلي العلاقة تعيسة.

4-عمل روابط وهمية

من أكبر الأخطاء اللي ممكن تقع فيها، هي إنك تختلق روابط وهمية بينك وبين شريكك، وتستبدل الحب والمشاعر الحقيقية بالروتين التقليدي لأي اتنين مرتبطين، والأخطر إنك تفقد شخصيتك وملامحها عشان عايز تلاقي الأمان في العلاقة دي فتبدأ تهتم بالتصرفات اللي تخلي شكلكوا كويس أو ترضي الطرف التاني حتى لو هي مش بتعبر عنك بشكل حقيقي.

5- استخدام "الشات" للمواضيع الكبيرة

أثبتت الدراسات إن كل ما الستات يبعتوا رسايل أكتر كل ما الراجل بيكون أتعس وأقل قدرة على التعامل مع الموضوع، عشان كدة الأفضل هو تأجيل النقاشات المهمة و"الخناقات" للمقابلات وجهًا لوجه.

6-"تفكير المطبخ"

وهو مصطلح بيعبر عن حالتك أما تتخانق مع شريكك على حاجة وبعدين الغضب يخليك تفتكر حاجات تانية مضايقاك منه حتى لو مالهاش علاقة بالموقف الحاصل، والدراسات اللي سجلت حالات مشابهة كانوا بيبقوا دايمًا عندهم شعور بالغضب والأسى ناحية علاقاتهم بشكل عام طول الوقت.

7-التقليل من شريكك

الغضب والعصبية اللي بتعبر عنهم بإنك تقلل من شريكك هما أول إشارة لنهاية العلاقة، لأن هيبقى صعب بعدها إنك تشوف الأمور من وجهة نظر الشريك اللي إنت شايفة أقل منك بالإضافة لصعوبة تقل أي حد للنظرة دي له.

8-الكلام مع الناس وحش عن شريكك

استخدام التفاصيل الشخصية في الحكايات مع الناس الأغراب، أو محاولة إحراج شريكك قدام الناس، من الحاجات اللي ممكن تفسد علاقتك تمامًا.

9- الانفصال لأسباب غلط

كل الناس بتمر بمرحلة الملل، أو إنهم يحسوا إن شريكهم بقى أبعد شوية عن الأول، وممكن ينفصلوا بسبب إنه "مابقاش موجود زي الأول"، مع إنك هنا هتبقى بتلوم شريكك لمجرد إنه بقى عادي، واللي مش عادي هو القرب الزايد والطاقة اللي بتكون موجودة في وقت "شهر العسل" اللي في أي علاقة، واللي بيجي بعد كدة هو اندماج العلاقة مع روتين حياة الطرفين الطبيعي.

10- الإيمان بالسعادة الأبدية

الأبحاث بتقول إن الناس الأسعد في جوازهم أو ارتباطاتهم العاطفية هما اللي مش مؤمنين إن فيه حاجة اسمها سعادة أبدية، واللي عارفين إن القرب من حد فترة طويلة ممكن يمر بفترة سيئة زي ما بيمر بفترات كويسة.

Comments: