إزاي ماتعانيش من كتر ما بتهاتي في خرا؟

29/07/2019

فيه نوعيات من المشاكل بتبقى محتاجة وقت طويل عشان تتحل، ومشاكل تانية عموما مابتحتاجش وقت بس بتستنزف وقت وطاقة ومجهود، عموما النوعين من المشاكل بيخلوا الواحد يأكتف موود الفنان علاء مرسي ويحس إنه بيهاتي في خرا.

لتبطيل موود الفنان علاء مرسي إحنا بنهاتي في خرا امشي على الخطوات دي:

1- حل صراعاتك الشخصية:

اتجنب السلوكيات اللي بتخلي المشكلة تبقى أسوأ، ولما تواجه مشكلة مع شخص الجأ للشخص اللي بتثق فيه وروح اتكلم معاه عن المشكلة اللي حصلتلك سواء كان الشخص ده حد من صحابك أو أهلك لإن في أوقات لو اتصرفت فيها في وقت انفعالك هتزود الأمور سوء.

2- اعرف كويس المشكلة عبارة عن إيه:

اتجنب الجدال عشان هيخلي الشخص اللي بتتكلم معاه هجومي وبدل من الجدال حاول توصل لحل واتأكد من فهم إيه اللي مضايق الشخص اللي قدامك، لإن ساعات الناس بيبان إنهم متضايقين من حاجة واحدة بس لكن في الحقيقية إنهم متضايقين من حاجات، فلو كنت عايز ماتهاتيش في خرا فلازم تشوف إيه المشكلة الصح الأول عشان تحلها.

3- حاول تشوف وجهة نظر الشخص التاني:

الطبيعي في حالة الجدال والمشاكل كل طرف بيبقى فاكر إن هو الصح بس، وقليل جدا من الناس اللي بيجادلوا معاك عشان يكسبوا نقط بس، حاول تشوف هما واقفين فين وتفهم وجة نظرهم عشان على الأقل تتقابلوا في حته في النص.

4- اتأكد إن اللي قدامك واصله إحساس إنك بتحترمه:

غالبا الناس لما بتحس إن اللي قدامهم مابيحترمهمش بيبقوا عدوانيين أكتر حتى لو كانوا متفقين معاك، وكده هتهاتي في خرا أكتر عشان تحسسهم إنك بتتختلف معاهم بس مش بتقل من احترامهم، وحاول تحسس اللي قدامك إن هو المتحكم عن طريق إنك بتديله اختيارات ماتجبرهوش على حاجة.

بالنسبة بقى لو بتهاتي في الخرا مع نفسك ومشكلتك مش الناس اعمل الخطوات دي:

1- خليك هادي:

بالنسبة للمشاكل اللي بتقابلك في يومك العادي زي إن العربية تعطل أو مشاكل في شقتك أو مشاكل في الشغل، كل اللي عليك وقتها إنك تلتزم الهدوء بدل ما تهاتي في خرا، بلاش تعصب نفسك وتحس إن العالم كأنه بينتهي أو يبقي سبب إن يجيلك بانيك.

2- جمع معلومات عن المشكلة اللي حصلت:

كل ما زادت معرفتك بالموقف اللي حصل والاختيارات المتاحة هتزيد قدرتك على التعامل مع المشكلة، واتكلم مع ناس اتعاملوا مع المشاكل دي قبل كده، وفكر في بلان A و B و C كمان.

3- خليك مستعد للتصرف:

بدل ما تفضل تهاتي في كل الحاجات دي بس اتصرف بقي وخليك مستعد تطبق الحلول على أرض الواقع، لإن كل ما تأخد خطوات في حل المشكلة أسرع هيبقى أسهل حلها، أوقات بتبقي خايف من الفشل في الحلول بس ماتخفش أكيد هتنجح في الأخر.

4- اتعامل مع الناس:

ساعات في مشاكل هتفضل تهاتي فيها في خرا ومش هينفع فيها أي حاجة من الكلام ده، فالأحسن ماتنغلقش على نفسك وتبدأ تتعامل مع الناس لإن ده هيساعد أكتر مش هيبوظ، لإن الناس لبعضها فعلا زي ما بيقولوا فلما تتكلم مع الناس عن مشاكلك هتلاقي إن بقى أحسن التعامل معاها.
 

Comments: