٦ أسباب عشان تتجوزوا البيست فريند: عِشرة وحب غير مشروط

30/07/2019

كتب - جلوكال للعلاقات العاطفية:

الجواز قرار مصيري، بتختار شخص هتشارك معاه كل حاجة حرفيا ولنهاية العمر -تقريبا- وعشان كده عدد ضخم جدا الأسئلة ممكن ييجوا في بال الشخص قبل ما يختار شريك حياته، إحساس إنك هتقضي حياتك مع الشخص اللي اختارته ده إحساس مرعب/ جميل.

ولأن عملية الاختيار مش منطقية وداخل فيها عشرات العوامل، من العواطف للاهتمامات والتفضيلات والمواقف الشخصية والتصورات السابقة عن الحب والجواز، مع شوية عادات وتقاليد، مع خبرات سابقة في العلاقات العاطفية، كل ده بيخلي عملية الاختيار معقدة أكتر، عشان كده موقع LoveBondings جمع شوية أسباب بتؤكد إن اختيار البيست فريند كشريك حياة، حل ذكي ومناسب.

1- عارفين بعض كويس

لما العشرة بتطول بينكم كصحاب بتبقوا حافظين بعض، عارفين الاهتمام المشتركة، تفضيلات الأفلام والمزيكا والأكل والخطوط الحمرا والحاجات اللي بتفرح/ بتزعل، كل طرف بيحب إيه وبيكره إيه لدرجة إن نظرة بسيطة في أي موقف ممكن تخلي كل واحد يفهم التاني حاسس بإيه أو عايز يقول إيه.

ده معناه إنكم هتتجاوزا جزء صعب ومهم في أي علاقة، وهو إنكم تعرفوا بعض (ممكن يكون عيب أحيانا لأن الفترة دي بتبقى جميلة)، لكن عموما هتوفراوا إرهاق تجربة الحاجات عشان تحفظوا بعض.

2- مفيش تمثيل

محدش فيكم محتاج يمثل أو يزين تصرفاته، إنتوا عارفين بعض كويس وشايفين بعض في كل الأوقات، الوحش قبل الحلو، ممكن أي طرف يمر بفترة سيئة، يتحول أحيانا لشخص عصبي أو مهمل في نفسه ومش بنفس قدر الوسامة أو الجمال.. "البيست فريند" شاف ده كتير قبل كده وعارفه وحافظه ومتعود عليه، مش محتاجين تمثيل

3- ذكريات حلوة/ شركاء جريمة

لو إنتوا Best Friends من فترة طويلة أو من الطفولة، فأكيد عملتوا جرايم كتير مع بعض وعديتوا بمواقف عملت بينكم ذكريات حلوة ماتتنسيش، الذكريات دي هي اللي بتعمق العلاقة بين أي اتنين وبتدي بعد مختلف وشكل من أشكال العشرة، الأهم إنكم -إن شاء الله- هتفضلوا تحافظوا خوض المغامرات والتجارب اللي بتصنع الذكريات الحلوة.

بعد تاني لفكرة الذكريات، وهي إنكم اتعودتوا خلاص تقضوا وقت طويل مع بعض، الموضوع مش هيبقى مخيف أو Creepy لما تتجوزوا وتعيشوا مع بعض طول الوقت.

4- حب غير مشروط

البيست فريند اللي اتعود يحبك من غير أي غرض أو مصلحة، عشان إنتوا صحاب قريبين، هيفضل -لو هو أصيل وابن ناس- يقدم نفس الدعم والحب غير المشروط في كل الحالات، وهيفضل موجود في أسوأ الظروف، زي ما كان موجود في ظروف تانية صعبة وسيئة على مدار علاقتكم

5- مابتزعلوش من بعض فترة طويلة

إنكم تبقوا Best Friends ده معناه إنكم عديتوا بمواقف سخيفة كتير، اتخانقتوا واختلفتوا واتخاصمتوا، بقيتوا عارفين بعض وقت الزعل عاملين إزاي، بقيتوا عارفين إيه اللي ممكن يخلص الزعل، وده هيساعد طول علاقتكم إنك تحلوا خلافاتكم بطريقة أهدا، ممكن فترة Break قصيرة، مع شوية عتاب ترجع الدنيا زي الأول

6- الحياة أحلى

عموما وجود صديق قريب طول الوقت حاجة مريحة، شخص موجود في كل الظروف والأوقات، بتروح تحكيله أخبارك أول بأول عشان ده بيحسسك بامان زيادة أو بإثارة زيادة أحيانا، فمابالك لو كان الشخص ده هتكمل حياتك معاه؟

ملاحظة أخيرة: التحول من Best Friend لـ Lover ثم زوج ممكن ماتكنش حاجة سهلة أوي، لأن كسر الاعتياد على الحاجة ممكن يلخبط، الموضوع محتاج شوية تفكير واتفاق عاقل بين الطرفين.

Comments: