١١ معاناة بتعيشها الستات كل شهر وقت البيريود

30/07/2019

كل شهر نفس المعاناة لمدة سنين لكل البنات في العالم، نفس القصص المحرجة أو المتعبة والقرفة أو المشروبات السخنة، بس فيه مواقف كتير محرجة بتتعرضلها البنات مع كل بيريود بتجيلها وغالبا لإن أغلب البنات عانوا منها فيه إجماع على المواقف دي وبقيت محفوظة للناس كلها عشان كده هتلاقي إن فيه حاجات صعب تعمليها أو مابتحبيش أصلا تعمليها طول ما عندك البيريود زي:

1- مابتعرفيش تاخدي شنطتك براحتك وإنتي رايحة الحمام، خصوصا لو فيه حد سخيف طلع وقالك إنتي واخدة الشنطة معاكي ليه؟

2- مابتعرفيش تاخدي بسهولة "الباد" إلا لو شغلتي دماغك وغالبا هتحطيها في كم القميص

3- صعب جدا يعدي عليكي وقت البيريود وماتبقيش بتستخدمي كميات كبيرة من المناديل 

4- بتحاولي على قد ما تقدري ماتعطسيش طول ما عندك البيريود عشان بتحسي إن فيضان غير مبرر هينفجر

5- أكيد لازم البيريود تجيلك وإنتي عندك مناسبة مهمة نفسك تلبسي فيها لبس معين، فهتعكنن عليكي ومش هتعملي اللي إنتي عايزاه.

6- وفيه فقرة لازم تعاني منها وهي غسيل البنطلونات اللي بقعت 

7- مش هتعرفي تبقى بتقعدي وقت طويل من غير ما تعاني من فقرات "السيكبة" بتاعت هو البنطلون حصله حاجة، طاب الكرسي تمام؟

8- أو الطريقة القديمة اللي كنتي بتعمليها مع صاحبتك في المدرسة بتقوليلها "همشي قدامي وشوفي فيه حاجة في الجيبة ولا لا" 

9- والطبيعي المعتاد إنك مش هينفع يجيلك البيريود من غير ما تعاني من تقلبات المزاج وكل شوية لحالة للأعلى درجة فيها يا تضحكي أوي يا تعيطي.

10- فيه هدوم معينة بتتجنبيها خالص وقت البيريود وغالبا بتلبسي البنطلونات الغامقة، أو عموما بتلبسي أي حاجة غامقة وتداري الانتفاخ اللي بيبقى وقتها

11- صعب جدا "تأكتي كوول" لما يجيليك "كرامبس" في بطنك

Comments: