رقم قياسي.. إثيوبيا زرعت 350 مليون شجرة في 12 ساعة

30/07/2019

الحكومة الإثيوبية أعلنت إنها قدرت تزرع 350 مليون شجرة في يوم واحد بس (تحديدا في 12 ساعة) بهدف مواجهة ظاهرة التصحر والتغيرات المناخية اللي بيشهدها العالم كله، ضمن "الحملة الخضراء"، وده رقم قياسي لأكبر عدد شجر تتم زراعته في يوم واحد، وفي ألف موقع مختلف إثيوبيا.

الحملة خدت أهمية كبيرة جدا كمشروع قومي لمحاربة التصحر، لدرجة إن الحكومة منحت الموظفين راحة من الشغل للمشاركة في الحملة، وعموما، دي المرحلة الأولى من الحملة اللي عايزة إثيوبيا توصل بيها لزراعة 4 مليار شجرة في شهر أكتوبر الجاي.

إحصائيات الأمم المتحدة بتقول إن مساحة الغابات في إثيوبيا كانت 35% من إجمالي مساحة البلد، وبعد 100 سنة انخفضت مساحة الغابات لـ 4% فقط.

وزير التكنولوجيا أعلن على "تويتر" إن عدد بذور الشجر المغروسة عدت الـ 350 مليون في 12 ساعة بس، ده غير إن فرق من الأمم المتحدة والاتحاد الأفريقي والسفارات الأجنبية في أديس أبابا شاركوا في الحملة.
 

Comments: