بنفكرك بيه: "Gilmore girls" افصل بيه في الأيام الصعبة

01/08/2019

زي ما الأفلام والمسلسلات الجديدة لها متعتها وتشويقها، الأعمال القديمة نسبيًا اللي عاصرنا وقتها أيام وذكريات بعينها هي كمان لها رونقها اللي لسة محتفظة فيه، عشان كدة بنفكرك بحاجات ممكن تبقى راحت عن بالك لكن لو افتكرتها وقعدت تتفرج عليها يمكن تنبسط أو يعتبر وقت مستقطع من روتينك الطبيعي اليومي.

مسلسل "Gilmore girls" أو "فتيات جيلمور" مسلسل درامي كوميدي أمريكي، إنتاج سنة 2000، بيحكي قصة أم وبنتها متقاربتين في السن، وبدخول البنت مرحلة المراهقة والشباب بتكون تقريبًا مشتركة مع والدتها في نفس المرحلة العمرية بمتطلباتها ومشاكلها.

الأم (لورلاي) سليلة أسرة غنية لكن سابتهم عشان تربي بنتها (لورلاي بردو بس بيقولوا لها روري) لوحدها وهي عندها 16 سنة، لأنها مش على وفاق معاهم، وانطلاق الأحداث بيكون من هدف الأم في توفير أفضل تعليم لبنتها وتوصيلها لهدفها إنها تكون صحفية، ودة اللي بيضطرها ترجع تحتاج لأسرتها وبيخليهم يرجعوا في الصورة ويكونوا جزء من الأحداث.

المسلسل مناسب جدًا إنك تعيش معاه فترة من الروقان في عالم مفيهوش مشاكل كبيرة أو أزمات تحتاج منك تركيز أو طاقة، معظم الأحداث بتدور في بلدة صغيرة اللي عايش فيها "لورلاي" و"روري"، وخلفية الأحداث الأساسية لحياتهم، هي مجريات الأمور اللي ممكن تحصل في بلدة صغيرة متمدينة لكن هي أقرب للقري الريفية، كل الناس عارفين بعض، وبيشتركوا في أحزان وأفراح وأزمات المكان، بالإضافة للصدامات بين أهل البطلات اللي هما أغنياء جدًا في الأساس وبين مستوى الابنة وانتمائها للبلدة اللي عاشت وربت فيها بنتها.

المسلسل مكون من 7 أجزاء من دخول "روري" المدرسة الثانوية، لحد تخرجها، بالإضافة لجزء أخير بعنوان "Year in life" وهو مكون من أربع حلقات بس حسب فصول السنة، وبيقدم سنة من حياة الأم وبنتها بعد تخرج "روري" والتحاقها بالشغل اللي بتحلم بيه.


 

Comments: