إزاي تتصرف وتساعد المصابين لو كنت موجود في موقع حادثة 

05/08/2019

بالرغم إن الحوادث من أكتر الحاجات المخيفة والمرهقة للأعصاب لكنها حقيقة للأسف وممكن تحصل في أي وقت وعنصر المفاجأة من أسوأ ما فيها، الحوادث أنواعها كتير ممكن تبقى بسبب عربيات أو قطارات أو إنفجارات، بغض النظر عن السبب في الحوادث بس أي شخص فينا معرض إنه يبقى موجود في مكان حادثة في أي وقت، المهم إن الشخص يبقى عارف إزاي يتعامل مع الكارثة اللي حصلت قدامه عشان ينقذ غيره أو يحاول على الأقل.

لو شوفت حادثة أو كارثة ممكن تتصرف بالشكل ده:

1- خليك هادي:

ممكن دي تبقى حاجة واضحة وبديهية بس لازم نأكد عليها عشان اندفاعك من غير أي خطط ممكن يزود الموضوع سوء ومايحليش حاجة، في الأول بس خد نفس عميق وشوف مدى خطورة الأزمة إيه وهتقدر تقدم مساعدات إيه حتى لو كانت صغيرة فهي أكيد هتفيد.

2- كلم الاسعاف على طول:

قولهم على المكان اللي إنت فيه بالظبط وشايف إيه بالتفصيل، وفي حال إنك نسيت رقم الاسعاف فالرقم هو (123).

3- قرب من المشهد أكتر:

لو كان ده متاح وأمن فعلا قرب بس بلاش تحرك حد من المصابين لإنك ممكن تزود الضرر عليهم أكتر إلا لو كنت واخد تدريب في الإسعافات الأولية وقادر تساعد فعلا لحد ما الاسعاف توصل.

4- طمن المصابين:

حاول تقولهم إنهم بخير والإسعاف في الطريق واطلب منهم مايتحركوش.

5- ثبت رأسهم ورقبتهم:

ثبت رأس المصابين ورقبتهم عن طريق إنك تحط إيدك على كل جنب، ده هيحمي المصاب من إنه يتحرك ويحميه زيادة الضرر أو إصابات أزيد.

6- أفضل موجود لحد ما الاسعاف توصل وبلاش تحرك حد الا في حالات معينة:

زي ما قولنا فوق إن بلاش تحرك الناس إلا لو إنت واخد تدريب طبي أو إسعافات أولية، وممكن حالة كمان لو إنت شايف إن هيكون فيه ضرر أكبر على الشخص المصاب زي إن ممكن يحصل انفجار أو حريقة مثلا أو وجودة في المكان ده خطر أكبر، وحاول تعمل ده كمان بأحسن طريقة ممكنه بمعنى إنه لو قادر يحرك نفسه حاول تسنده ولو مش قادر أسأل حد يساعدك ازاي تحركه.

7- احكي للإسعاف التفاصيل اللي شوفتها:

لو شوفت تفاصيل الحادثة من الأول حاول تحكيها للاسعاف زي ما هي، وحاول تقولهم حالة المصاب كانت عامله ازاي وغيره من تفاصيل هتقدر تساعدهم.

Comments: