٨ أسباب هتقنعك إن القعدة في العيد أفضل من السفر

08/08/2019

التقليدي في أي أجازة طويلة زي أجازة العيد خصوصًا في الصيف، إنك تبقى حجزت في أي مكان، وتسافر إنت وأسرتك أو أصحابك أو حتى لوحدك، وعلى التوازي فيه الألاف من الناس اللي بلا خطة أو حجوزات، وعشان دول، جمعنا مميزات القعدة في البيت والجانب المشرق لتقضية الأجازة من غير سفر أو رحلات.

1- مفيش زحمة

المكان اللي إنت فكرت تروحه في غيرك كتير فكر فيه، هتلاقي كل الوجهات التقليدية للوقت ده من السنة زحمة جدًا، ومشاكل الزحمة مش بس الدوشة والفرهدة، لكن كمان صعوبة الحجز، مشاحنات مستمرة، كواليتي قليل في كل الخدمات.

2- مش هتقابل ناس مش عايزهم

في نفس سياق الزحمة، إنت مُعرض طول الوقت إنك تقابل ناس ما شوفتهمش من زمان أو مش حابب وجودهم أصلًا، بجانب إن الطلعات الجماعية مش هتقدر تتحكم دايمًا في مين يجي أو لا.

3- مفيش "مناهدة"

المناهدة يعني المحاربة والمقاومة، ودة بالظبط اللي بيحصل في أي رحلة جماعية، سواء مع أسرتك أو أصحابك، عشان توصل لحل وسط يرضي كل الناس، أو عشان الجمع كله يتفق على رأي واحد.

4- هتخلص مسلسلاتك

مفيش أكتر من المسلسلات والأفلام المتراكمة اللي نفسك تشوفها، حتى لو في الأول كنت مضايق ومتذمر لأن مش دة اللي عايزه، حلقة واتنين وهتلاقي نفسك اندمجت وانبسطت.

5- حرفيًا هتفصل

مهما كنت بتحب الحركة والناس والتجمعات، كام يوم فصلان، هدوء، وسكون هيفرقوا معاك كتير.

6- الاستمتاع بالـ "لا شيء"

لو إنت شخص عامل، فأنت أكيد مدرك حقيقة إن الشغل عرض مستمر لا يتوقف، خلاص مابقاش فيه أجازة صيف، أو أجازة نص السنة، وبالتالي مفيش حاجة اسمها أيام فاضية بلا هدف تصحى فيها براحتك، تفطر وما تعملش أي حاجة، أو تسرح مع أي حاجة في التليفزيون لحد مواعيد الأكل الرسمية.. فرصتك ترجع لقواعدك.

7- حلل فلوس الكتب

أي حد من محبي القراية، هيكون عارف متلازمة جمع الكتب حتى لو لسة ما قراش اللي عنده، حوالي 9 أيام أجازة وقت كافي عشان تحلل فلوس الكتب دي وتبدأ تقراها.

8- بيجامة بارتي

ممكن تضم لقايمة الحاجات اللي ما عملتهاش من زمان، إنك تقعد في البيت وصحابك يجولك أو تروحلهم، خاصة اللي ساكنين بعيد أو كنت بتدور على فرصة في يومك العادي تزورهم.

Comments: