٩ حاجات تعملها عشان ماتشمش روايح العيد الكبير

08/08/2019

كل سنة واحنا طيبين ده أكيد بس كل سنة وإحنا بنقول نفس الجمل "ريحة البيت وكل البيوت لحمة وريحة الشارع زفرة ودم" وطبعا يتبعها جمل فيها قرف واشمئزاز وبطن موجوعة وهكذا، وصعب تعترض أو تتحكم في روايح الكون، بس السنة دي فيه كام حاجة جديدة ممكن يساعدوك زي القانون اللي منع الدبح في الشارع مثلا فده ممكن يقلل نسب الدم وروايح اللحمة والدم في الشارع ويخلي الناس تدبح في المدابح.

 بس لو مغلوب على أمرك وقاعد في البيت مع أهلك عشان تعيد معاهم وقرروا يدبحوا في البيت، بدل ما تتخانق ممكن تتجنب ريحة الدم واللحمة بالطرق اللي هنقولك عليها دي:

1- حاول على قد ما تقدر في الأول كده تعمل اكتفاء ذاتي في اوضتك وماتخرجش منها كتير، أكلك وشربك وتلفزيون مسلسلات بقي ومسرحيات ونتفلكس للصبح.

2- لو عايز "تسوشياليز" وكده وتتفسح في الشقة ممكن تولع بخور عادي جدا أو تشتري "جليد" وترش كل شوية

3- لو ريحة الدم والزفارة في الأرض أول حاجة هتعملها إنك تمسح الأرض بمياه فيها خل وملح.

4- أو ممكن تستخدم الخل الأبيض عادي في إنك تحط منه نص كوباية في حلة مياه وتسيبه على النار وهيمتص الروايح.

5- أو ممكن تحط شوية قهوة مطحونة على ورقة على أي ترابيزة والقهوة برضه بتمتص الروايح من المكان.

6- ممكن تجيب أي زرعتين نعناع أو ريحان وتحطهم في البيت، أو ممكن تقطف ورق منهم وتوزعه في البيت.

7- وممكن برضه بعد ما فقرة الدبح تخلص تحط زيوت عطرية على المياه اللي هتمسح بيها الأرضية وده هيساعد إن ريحة المكان تبقى أحسن لساعات، بس لو الريحة بتضايقك ممكن تحط شرايح ليمون وعصير ليمون ونعناع على المياه

8- ومياه الورد برضه مفيدة في الحالات دي ممكن تمسحي بيها الأرضيات أو مسطحات المطبخ في العموم وأي مكان اتحط عليه لحمة 

9- وأخيرا الحل التقليدي هات برفيوم أو اسبراي مخصوص لليوم ده وكل شوية رش شوية على ايدك وشم ايدك بدل ما تشم أي روايح تانية تضايقك  

Comments: