٩ خطوات هتعرفك إزاي تتعامل مع الصدمات العاطفية

06/08/2019

الحياة فعلا مابتقفش على حد زي مابيقولوا بس للأسف علاقات قليلة اللي بتفضل مع الشخص وفيه علاقات كتير بتنتهي بغض النظر عن نوع العلاقة، وده غالبا اللي بيخلي الشخص يمر بأزمات كتير وصدمات عاطفية كتير، عشان كده المفروض كل شخص فينا يبقى عارف إزاي ممكن يعدي الأزمات والصدمات العاطفية.

موقع wikihow قالنا خطوات تعلمنا إزاي تتعامل مع الأزمات العاطفية اللي بندخل فيها بسبب العلاقات في العموم:

1- خد خطوة واطلب المساعدة:

اطلب مساعدة من الناس اللي إنت واثق فيهم منك، وعموما لما هتطلب المساعدة من حد عشان تحقق هدف معين ده هيخلي إن فيه شخص تاني عارف أهدافك وهيساعدك في الوصول للهدف اللي عايز توصله.

2- دور على هواية أو مشروع جديد:

فيه وقت كتير عشان تملى به يومك، الوقت ده لو فاضي هتحس بفراغ ودماغك هتسيكيب عليك في اللي حصل، فلو كنت حاسس إنك مكتئب فكر في إنك تبدأ في مشروع جديد أو تبدأ تتعلم هواية جديدة، لإن الهوايات بترفع الصحة النفسية والبدنية، حتى لو إنك تبدأ تقرأ كتب في مجال بتحبه أو تتطبخ مثلا أو غيره يعني على حسب اهتمامتك اللي نفسك تعملها وماكنتش لاقي وقت تنفذها.

3- اتحرك:

حرفيا اتحرك يعني اعمل رياضة أو اتمشى أو اعمل أي شكل من أشكال التمارين سواء كان تركب عجل أو يوجا، املى وقت فراغك وركز على صحتك، لإن تقريبا تلت الأشخاص اللي بيعانوا من الألم النفسي أو الصدمات العاطفية بسبب الفقد بيعانوا من مشاكل جسدية، وبالرغم من إن الخطوات دي متعبة ومرهقة على الشخص حقيقي إلا إنها مهمة وبلاش تتجاهلها.

4- اشتغل على طرق صحية تخليك أحسن:

عدد كبير من الناس لما بيحسوا إنهم مش كويسين بيلجأوا للمخدرات أو الكحول أو بياكلوا أكتر، وكل دي طرق هتخليك مش كويس أكتر مش هتحل، فممكن تجيب حيوان أليف في البيت معاك أحسن تهتم بيه ويكون صاحب جديد ليك.

5- اتعرف كويس على مشاعرك:

حاول تتعرف على مشاعرك كويس وتعرف الشعور اللي بتحس بيه إيه بالظبط، وخد وقت كفاية قبل ما تاخد رد فعل في الحاجات اللي بتستفز مشاعرك وتخليك تستخدم عقلك العاطفي من غير تفكير، بمعنى إن قبل ما ترد على حد فكر بعقلك وبمشاعرك، ده هيساعدك رد فعلك يكون أهدى ولما تبقى هادي في ردود أفعالك ده هيخليك عارف تميز.

6- اكتب:

اكتب في "نوت بوك" عندك الأهداف اللي عايز تحققها، واكتب أفكارك واكتب عن الحاجات اللي ضايقتك واللي فرحتك لإن الكتابة هتساعدك تطلع اللي في دماغك ومش عارف تطلعه بالكلام مع حد.

7- اسمح لنفسك إنك تحزن:

لو فعلا فقدت شخص بتحبه اسمح لنفسك إنك تعيط وتحزن وتضايق عشان تتصالح مع مشاعرك بعد كده، لو ماخدتش وقتك في الحزن والتعبير عن مشاعرك هتاخد وقت أكبر عشان تدرك إن الشخص ده بعد عن.

8- اتعامل مع القلق والضغط والاكتئاب:

في الغالب لو فقدت حد بتحبه هتتعرض لواحد من المشاكل دي لإن الصدمات العاطفية أو الألم النفسي بيزود الاكتئاب والقلق، اتحكم فيهم بطريقة صح وبلاش تسيبهم ياخدوا حقهم منك.

9- إلجأ لمساعدة حد متخصص:

لو حاسس إنك مش عارف تتعامل مع الوضع بكل الطرق دي أو حاسس بأي أفكار مؤذية ليك أو لحد غيرك ممكن تلجأ لدكتور نفسي لإنه أكتر حد هيقدر يساعدك ويخليك تتخطى المشاعر دي كلها.


 

Comments: