إزاي تنجح في Long distance relationship؟

07/08/2019

الـ Long distance relationships أو العلاقات بعيدة المدى اللي كل واحد بيكون فيها في بلد بعيد عن التاني، بتمثل مشكلة لأصحابها، وعقبة بتخليهم مش عارفين يكملوا ولالا؟ يبدأوا أصلًا ولا الموضوع مش نافع؟ بشكل عام هي نوع من العلاقات دايمًا بنحاول نتجنبه وأما بندخل فيه مصاعبه وعيوبه أكتر من مميزاته، عشان كده جمعنالك شوية نصايح  ممكن تساعدك حسب ما ذكرتها مجلة "women's health".

1- حط قواعد ثابتة من الأول

مش ألطف حاجة إنك تبدأ علاقتك بحد بقوانين واتفاقات، لكن في حالة وجود مسافات، ضروري إنك تعمل كده لمصلحة ومصلحة الطرف التاني.

حاول من البداية تحط اتفاق لكل حاجة، هتشوفوا بعض كل قد إيه؟ فين؟ مين هيروح لمين بأي ترتيب؟ إنتوا رسمي في علاقة ملتزمين بيها ولا كل واحد هيعيش حياته عادي لحد ما تتجمعوا في مكان؟

2- استخدم فويس نوتس

الكتابة في أوقات كتير بتسبب سوء تفاهم، ممكن حد يبعتلك جملة عادية وإنت تحس إنه بيزعقلك أو مضايق، ودة بيحصل حتى في العلاقات الطبيعية، لكن كونك مش هتشوف الحد دة قريب عشان توضح أو تصلح الموقف بيخلي الموضوع أصعب، عشان كدة حاول دايمًا تستخدم فويس نوتس، أو تتكلم فيديو، لأن بشكل عام كونك تسمع رسالة بصوت حد بتحبه مهما كانت قصيرة بيكون شيء لطيف.

3- اتكلم بس أما يبقى عندك حاجة تقولها

مش معنى إن كل واحد في مكان ومش بتشوفوا بعض باستمرار إنكوا تتكلموا 24 ساعة، تخيل نفسك في علاقة طبيعية، هتلاقي إن أكيد بتعدي أوقات كتير هاديين أو مش بتتكلموا في حاجة، نفس الشيء اعمله هنا، لأن ده هيخلي كلامكوا له قيمة وفيه مشاعر أكتر.

4- اكتب ملحوظات

تابع شريكك باستمرار، لو قالك إن عنده معاد دكتور أو اجتماع مهم أو امتحان، ابعتله قبلها رسالة تشجيع، أو اسأل عليه بعد المعاد اللي هيعمل فيه الحاجة دي.

5-اتفرجوا مع بعض على حاجة

اعمل مع شريكك وقت ثابت تتفرجوا فيه على حاجة مع بعض، أيًا كان مسلسلكوا أو فيلمكوا المفضل شغلوه في نفس الوقت واتفرجوا عليه، ممكن كمان تشغلوا مكالمة فيديو في الوقت ده، المشاركة في حاجات زي دي بتقوي الروابط بين الاتنين.

6- حددوا معاد اللقاء قبلها بوقت

معروف إن التغيرات الطارئة كتير، وبشكل كبير ماحدش بيعرف يتحكم في مواعيده على المدى الطويل، لكن بشكل مبدئي وقياسًا على الظروف العادية، حطوا مواعيد متوقع إنكوا هتتقابلوا فيها، ده بيدي حافذ مهم، وحاجة تستنوها إنتوا الاتنين وتبقى عزاء ليكوا بقية الأيام.

7- شاركوا بعض استخدام حاجة

ممكن عن الطريق البوسطة كل واحد يبعت للتاني حاجات من مقتنياته الشخصية، على سبيل المثال ممكن تشتركوا في نفس التيشيرت تبعتوه لبعض، كتاب مفضل، شنطة..إلخ.

8- فاجيء شريكك بهدايا 

في فترات الزيارات خبي هدايا أو تذكارات في بيت شريكك أو مكتبه، بحيث يلاقيها في أوقات مختلفة أما تبقوا مش مع بعض.

9- اكتب إنت ليه واثق في شريكك؟

المسافات والبعد أوقات كتير بيخلي الأفكار ترهق الواحد وتشككه في علاقته وشريكه، عشان كده في الأوقات اللي تحس فيها بالسعادة والأمان، حاول تكتب في نوتة أو على موبايلك مشاعرك وليه إنت سعيد وواثق في شريكك، دة هيساعدك في الأوقات الصعبة.

10- اتكلم عن سبب وجودك في العلاقة

ما تحاولش تتجاهل إن علاقة بعيدة المدى تعتبر تحدي بالنسبة لك، بس لازم تبقى عارف إنه اختيار الطرفين اختاروه مش حاجة إنت مجبر تكون فيها، لأن رؤيتك للوضع هتأثر على مدى رضاك عنه، وده يخليك تحاول دايمًا تعبر عن حبك لشريكك وتوضيح إن علاقتكوا تستحق كل المجهود ده، وإن شكل العلاقة ده أفضل من عدم وجودها على الإطلاق.

11- حط خط نهاية

في لحظة ما هتحس إنك ناقم بشدة على الوضع دة ومش قادر تستحمله، وعشان اللحظات دي تعدي لازم تبقى عارف إن فيه نهاية هتيجي في وقت ما، مثلًا أما تخلص دراستك هتنقل عند شريكك أو هو هيجي بعد ما حاجة معينة تحصل.

12- خلي عندك أنشطة خاصة بيك

في كل أنواع العلاقات لازم يكون فيه حاجات مشتركة وحاجات مستقلة لكل طرف عشان العلاقة تبقى صحية، وفي حالة المسافات، ممكن لحظات كتير تحس إنك وحيد أو معزول، حاول تلعب رياضة أو تتعلم حاجة جديدة، عشان وقتك يبقى مشغول.



 

Comments: