بنفكرك بيه: فيلم Notting hill السهل الممتنع في رومانسية التسعينات

07/08/2019

زي ما الأفلام والمسلسلات الجديدة لها متعتها وتشويقها، الأعمال القديمة نسبيًا اللي عاصرنا وقتها أيام وذكريات بعينها هي كمان لها رونقها اللي لسة محتفظة فيه، عشان كدة بنفكرك بحاجات ممكن تبقى راحت عن بالك لكن لو افتكرتها وقعدت تتفرج عليها يمكن تنبسط أو يعتبر وقت مستقطع من روتينك الطبيعي اليومي.

سينما التسعينات قدمت عدد كبير من الأفلام والمسلسلات الرومانسية اللي ساهمت بشكل كبير في نشأتنا وتكوين فكرتنا عن العلاقات والعواطف، وعلى الرغم من رقة الأفلام وخفتها واللي معظمها ممكن يتصنف رومانسي كوميدي أو دراما، إلا إنه كان بيقدم في الغالب مواقف معقدة ومشاعر وأفكار متشابكة، بتتحل دايمًا بشكل يحمل سمات الأساطير العاطفية في وجود تضحية أو فعل كبير، لكن بتتقدم بشكل بسيط وواقعي يحسسك إن ده ممكن يحصل معاك.

على جانب تاني الفترة دي قدمت طفرة كبيرة في ترجمة أدق المشاعر الإنسانية والأفكار والمواقف المبهمة والمحرجة أحيانًا بكلمات وأساليب بسيطة، ساعات بتغلب عليها الكوميديا، ودة بيقدم رسالة الفن في أبهى صورته وهو التعبير عنك وأخدك خطوة لقدام بالتصالح مع تعقيداتك بعد ما تشوفها بوضوح على الشاشة.

فيلم Notting Hill من بطولة جوليا روبتس وهيو جرانت، بيحكي عن علاقة شاب عايش في بلدة صغيرة صاحب محل كتب، بيقابل نجمة سينمائية مشهورة بعد دخولها فجأة لمكتبته، وبيقع في حبها، بعد ما تتعرف عليه وتقضي وقت معاه ومع أصحابه، في وقت من حياته هو بالفعل بيدور على شريكة مناسبة له بعد عدد من علاقات الحب الفاشلة.

الفيلم هيقدملك أكتر من مأزق إنساني ممكن تتحط فيه في حياتك، علاقة قوية بين البطل وأصدقاءه، اللي منهم واحدة كان بيحبها زمان وبعدين اتجوزت صديق مقرب له وعملت حادثة سببتلها شلل، وجوزها استمر يرعاها بكل حب، واتحول الموقف لأن علاقتهم هي أيقونة الحب الحقيقي بالنسبة له.

بالتوازي بيقدم صراع الشاب الذكي المثقف المنطوي بين أفكاره ومشاعره وبين حقيقة الموقف إنه بيحب نجمة سينمائية مشهورة وشديدة الثراء، والمميز في الفيلم هو إن التيمة والحدوتة تبدو مكررة لكن أجواء الفيلم والمواقف اللي بيتقدم من خلالها الأحداث هادية ومتفردة.

تقييم الفيلم على IMDb هو 7.5 من 10، وعلى Rotten Tomato هو 83%، ونرشحهولك بشدة لأمسية هادئة في أجازة نهاية الأسبوع.

Comments: