٥ أسئلة خليك جاهز عشان هتتسألهم في العيد

08/08/2019

العيد يعني تجمعات عائلية ولمة عيد، وعلى الأقل أربع أيام أجازة قاعد فيهم مع أسرتك، وصعوبة وجودك فيها هو إنك هتسمع أسئلة جاوبت عليها مرات كتير قبل كدة، وكلها بتعبر عن رغباتهم في إنك توصل لشكل حياة هما شايفينه مناسب ليك، وإنت شايف غير كدة.

 جمعنالك أهم الأسئلة دي عشان تبقى مستعد.

1- مش أكل البيت أنضف وأحلى؟

معظم الشباب من بعد التخرج ولحد سن الأربعين تقريبًا مواعيد شغلهم بتحتم عليهم ياكلوا برة، دة غير إن فيه ناس ما بتحبش أكل البيت أصلًا، ووجودك أربع أيام في البيت في عيد تقليده الأساسي هو أكل اللحمة، هيخلي دة مادة أساسية للحوار.

2- إيه دة إنت مش بتحب اللحمة؟

في نفس سياق الكلام عن الأكل، اللحمة الضاني لها أعداء كتير، وكل ناس أسرتك هتتفاجيء إنك إزاي ما بتحبش اللحمة!

3- مش كان زمانك بتعيد/ي في بيتك؟

الجواز هو الحلم الأكبر اللي بيتمناه أي أهل لأولادهم وفي أي تجمع عائلي بيكون هو الموضوع الأساسي للكلام، ودي صياغة التأنيب لو كان فيه مشاريع بالفعل إنت بوظتها قبل كدة.

4- مش ناوي/ة بقى؟

دة سؤال إليكتروني نازل مع أي حد هيسلم عليك أو هيشوفك في أي لمة أسرية وعائلية.

5- إنت بقى بتشتغل إيه؟

دي حاجة بيعاني منها كل اللي بيشتغلوا في تخصصات مركبة أو مش شبه الوظايف الأساسية والتقليدية اللي هي دكتور أو مهندس أو محامي..إلخ، واللي مهما قولتها هتبقى مضطر توضح من الأول في أي تجمع للعائلة الكبيرة أو الناس اللي مش بتشوفهم غير في الأعياد.


 

Comments: