١٥ قوى خارقة أكيد اتمنيت يبقى عندك واحدة منهم

08/08/2019

أفلام الأبطال الخارقين كان ليها تأثير كبير على شخصية كل واحد مننا واحنا صغيرين حتى لو ماكنش فيه تأثير كبير على شخصيتك مباشرة فأكيد أثر في تفكيرك وخلاك في وقت ما بتفكر إنك عايز يبقى عندك قوى خارقة وتعمل حاجة مش مألوفة بالنسبة للناس بغض النظر عن إنها خير أو مساعدة للعالم والبشرية زي باقي الأبطال الخارقين أو حاجة تساعد بيها نفسك وتتخلص من مشكلة بتعاني منها مش عارف تتغلب عليها بقوى البشر العادية.

القوى الخارقة اللي أكيد كنت عايزها في يوم من الأيام كانت عشان تخلي حياتك أسهل مش لازم عشان تحارب الأشرار، خلينا نقولك 25 قوى خارقة أكيد فكرت إنك عايز قوة منهم في يوم من الأيام، حسب موقع List25:

1- التقليد:

أكيد كل واحد مننا فكر في يوم إنه عايز يبقى أحسن واحد وبيعرف يعمل كل حاجة، فكل ما تشوف حد ناجح في مجال معين وتعوز تقلده ينفع تقلده بالقوة الخارقة دي.

2- الاختفاء:

من وقت ما عملوا فيلم سر طاقية الإخفا وفيه ناس بتتمنى القوى دي، بس أغلب الناس نفسها تعرف تختفي عادي من غير قوة خارقة، بس زي ما ظهر في الفيلم برضه إن مش كل اللي بتمني إنه يختفى بيبقى عايز يعمل خير أغلب الناس عندهم نوايا سيئة وشريرة من فكرة الاختفاء.

3- الشفا:

كل ما بتكبر في السن كل ما ضهرك بيوجعك من القعدة على المكتب أكتر، ورقبتك بتعلق كذا يوم لو نمت على مخدة مش مريحة ولو كلت أكله تقيلة شوية بطنك هتتعب كذا يوم ورا بعض، وعن طريق القوى الخارقة بتاعت الشفا هتقدر تصلح كل المشاكل الصحية اللي تعبت منها.

4- التحمل:

في أفلام الأبطال الخارقين، الأبطال بيقدروا يحاربوا الأشرار طول النهار ويجروا مسافات غير منطقية من غير ما يتعبوا، بس بقوى التحمل الخارقة كل اللي هتعوز تعمله إنك ترجع من الشغل مش تعبان مثلا أو تحافظ على حياتك الاجتماعية مع الشغل من غير ما تتعب وتقول أصل ماعنديش طاقة للخروجة دي.

5- تتنفس تحت المياه:

ممكن دي ماتبقاش قوة خارقة لأقصى درجة زي باقي القوى التانية، بس القوى دي هتخلي أسعار الغطس أرخص، ده غير إنك هتفوز في مسابقات التنفس تحت المياه وهتكسب صحابك وإنتوا مسافرين في اللعب دي.

6- الحصانة:

فكر في كل مرة صباع رجلك الصغير اتخبط في طرف الكومدينو وفضلت تصوت شوية بسبب خبطة واحدة، قد إيه حياتك كانت هتبقى أحسن 100 مرة لو ماحستش بأي نوع من أنواع الألم، وطبعا الحصانة هتكون من أنواع ألم أكبر زي إنك جسمك هيبقى مضاد للرصاص مثلا.

7- السفر بالزمن: 

الناس في الأفلام لما بيبقى عندهم القوة الخارقة دي الموضوع بينتهي إن الحاضر بيبقى أسوأ بكتير من اللي إحنا فيه، بس بما إنك شوفت الحاضر وعرفت غلطاتك اللي وصلتك لكده دلوقتي أكيد هتبقى عارف تصلح اللي حصل قبل كده عشان الحاضر والمستقبل يبقوا أحسن، وغالبا أصح حاجة تعملها لو رجعت بالزمن إنك كنت هتشتري أرقام اليانصيب الفايزة.

8- تشوف بليل:

فاكر اللي قولناه فوق عن صباع رجلك الصغير؟ أكيد إنك تشوف بليل هتخلي طريقك للحمام أمن أكتر من كده.

9- قراية الأفكار:

فاكر فيلم الحاسة السابعة؟ الموضوع كان له مميزات كتير بيعرف الناس اللي عايزة تأذيه وعارف أفكار البنت اللي عايز يصاحبها ومعجب بيها وعرف يدخلها من أفكارها، بس برضه فيه عيوب بشعة أصل أكيد يعني فيه سبب معين بيخلي الناس تحتفظ بأفكارها وكلامها في دماغها.

10- تفهم كل الكلام:

القوة دي ممكن يبقى اسمها "Omnilinguilism" وهي عبارة عن إنك تفهم كل اللي الناس عايزة تقوله سواء عبروا عنه أو لا، ولو عبروا عنه بأي لغة تقدر تفهمه برضه.

11- تجري بسرعة:

لو طريقك اليومي فيه كوبري أكتوبر أو صلاح سالم أو الدائري فإنت محتاج القوة الخارقة دي أول حاجة لإنها هي اللي هتخليك قادر تتخلص من الأزمات المرورية اليومية وهتاخد مشاويرك كلها جري ده غير كمان إنك هتحرق وتخس من غير ما تروح الجيم.

12- تتحكم في الجو:

أكيد فيه مرة سافرت فيها وقررت تروق على نفسك والجو عملها معاك يا إما الدنيا مطرت جامد أو الشمس كانت حارقة فكان كبيرك تخرج ساعتين الصبح وساعتين آخر النهار وشكرا، لو كان عندك القوة الخارقة دي كان زمانك بتتحكم في الجو وبتظبطه على أساس سفرك أو المواسم اللي بتحبها.

13- تعرف المستقبل:

قولنا قبل كده إنك لو سافرت بالزمن هتغير الحاضر، بس ممكن تعيش الحاضر عادي وتغيير المستقبل، هتعرف مثلا قبل الامتحان المفروض تذاكر إيه، قبل ما تدخل أي علاقة هتعرف ممكن تكملوا ولا لا، هتعرف هتتجوز إمتى بالظبط عشان تقول لست الحبايب وصحابها الجيران ويبطلوا يقولولك هنفرح بيك إمتى.

14- تحرك الجمادات بعنيك:

بدل ما تقوم تجيب المياه لنفسك هتقدر تحرك عينك في اتجاه إزازة المياه وعن طريق قوتك الخارقة إزازة المياه هتجيلك، ده غير إنك بعد ما تاكل ممكن تبص للأطباق فهتروح للمطبخ لوحدها ومش هتتخانق مع حد على مين اللي هيشيل الأكل، وطبعا لو إنت شخص مش تافه للدرجة دي ممكن كده ممكن تسرق بنوك بالطريقة دي.

15- تكلم الحيوانات:

بدل ما القطط تنونولك بس وماتبقاش فاهم منها حاجة أو تتكلم مع القطط والكلاب ويسيبوك ويمشوا تقدر تتكلم معاهم وتتناقشوا وتوصلوا للي إنتوا عايزينه أو تفهم هما عايزين إيه أصلا.

Comments: