١٠ أسباب تخليك تنضم لرابطة "الناس اللي مابتحبش العيد"

08/08/2019

زمان الفنانة صفاء أبو السعود قالت العيد فرحة ومش بس كده دي علت على نفسها وقالت إنها أجمل فرحة كمان، بس كنا أطفال بقى وصدقناها لحد ما كبرنا كده وعرفنا إن حقيقة الأمر إن الأطفال بس هما اللي بيسرقوا فرحة العيد لوحدهم بس كل ما الشخص بيكبر كل ما فرحة العيد بتقل لحد ما بتدخل في مرحلة النضج والعيد بيبقى وقت ملل بس.

رابطة الناس اللي مابتحبش وقت العيد كبيرة وليهم أسبابهم خلينا نقولك الأسباب:

1- السفر في العيد خصوصا في الإجازات الطويلة عبارة عن حاجتين إنك هتخلص كل فلوسك وهتروح لمكان زحمة ومليان ناس والبحر بيبقى عبارة عن أطفال كتير ودوشة وكل الأماكن بتقلب على العجمي 1994.

2- لو قعدت في القاهرة أو أي محافظة تانية المفروض إنها بيتك يعني هتلاقي إن كل المحلات قافلة وكل الناس بتخرج في نفس الأماكن.

3- العيد هو عبارة عن يوم الجمعة بس كبير شوية هتقعد مع أهلك هتلاقي نفسك بتتخانق معاهم، هتقعد مع صحابك هتتخانق معاهم، هتقعد مع قطط وكلاب هتزهق منهم وتتخانق معاهم 

4- التلفزيون المصري بكل التطور اللي حصل فيه ده والفضائيات وغيرهم بيعرضوا نفس المسرحيات والأفلام كل عيد سواء عيد صغير أو كبير أو شم النسيم أو عيد عمال 

5- لو إنتي بنت بالتحديد شوارع القاهرة االكبري وضواحيها والمناطق المجاورة بتبقي عبارة عن تجمعات من الشباب "الأندرإيدج" اللي ممكن يتحرشوا بيكي أو يضايقوكي في أي وقت 

6- زي ما المحلات كمان بتقفل أي حد بيبيع خضار وفاكهة وعيش بيبقوا قافلين برضه فلازم تكتفي ذاتيا وتاكل اللي موجود عشان الاختيارات دي شيء ترفيهي مش موجود وقت العيد 

7- لو اخترت أكتر الحلول البائسة وقررت تشتغل في العيد مش هتلاقي حاجة تشتغل عليها عشان إنت اللي عملت في نفسك كده من غير ما تقصد بجملة "بعد العيد إن شاء الله"

8- غصب عنك هتلجأ لحل النوم الجميل اللي هتهرب به من كل ده وأهو تريح جسمك هتلاقي على آخر يومين إن جسمك مش قادر ينام تاني وبيشتمك من كتر التعب اللي تعبه من النوم.

9- لو قررت تنزل تقعد على القهوة أغلب القهاوي بتبقى قافلة ما هما كمان بيعيدوا يعني.

10- وغالبا الاختيار اللي مش هتلاقي غيره قدامك هو إنك تفتح نتفليكس أو تتفرج على أفلام ومسلسلات ماشوفتهاش زي كل يوم بترجع فيه من الشغل عادي جدا.

Comments: